Organizata Ndërkombëtare për Migracionin (IOM) ka paralajmëruar se numri i të vdekurve në Mesdhe mund të arrijë në 30.000 gjatë 2015-s, bazuar në shifrat aktuale.
Sipas saj, 1727 emigrantë kanë vdekur gjer tani këtë vit në përpjekje për të vënë këmbën në Europë, krahasuar me vetëm 56 viktima në të njëjtën periudhë të vitit të shkuar.
Në një njoftim, organizata thekson se tani druhet që numri i përgjithshëm i emigrantëve të vdekur gjatë 2014-s, 3.279, mund të tejkalohet këtë vit në pak javë.
Një valë emigrimi nga veriu i Afrikës ka shpërthyer në javët e fundit, e pasuar me një varg tragjedish, më e rënda e të cilave qe të shtunën, ku besohet të kenë humbur jetën mbi 800 fatkeqë.
Të enjten pritet një takim i udhëheqësve europianë për të diskutuar një plan me dhjetë pika për ndalimin e humbjeve të jetëve të tjera në Mesdhe. /tesheshi.com/
