Investimet e letrave me vlerë arrijnë 383.8 milionë

Banka Qendrore e Kosovës ka njoftuar se kategoria e investimeve në letra me vlerë në dhjetor të vitit 2014 ka arritur në 383.8 milionë euro, duke shënuar rritje vjetore prej 8.3-për qind, dukshëm më të ulët sesa rritja prej 38.2-për qind e shënuar në vitin pararendës.
“Rrjedhimisht, pjesëmarrja e letrave me vlerë në asetet e sektorit bankar arriti në 12.0 për qind në dhjetor 2014 nga 11.6 për qind sa ishte në vitin paraprak. Në kuadër të gjithsej investimeve në letra me vlerë gjatë vitit 2014, vërehet orientim më i madh i bankave drejt investimeve në letrat me vlerë të Qeverisë së Kosovës”, është thënë në Raportin e Stabilitetit Financiar të Bankës Qendrore të Republikës së Kosovës.
Sipas BQK-së, në dhjetor të 2014-s investimet në letra me vlerë të Qeverisë së Kosovës shënuan rritje vjetore prej 92.6-për qind, duke rritur pjesëmarrjen në gjithsej portofolin e investimeve në letra me vlerë në 50.2 për qind, kurse 28.2 për qind ishte në dhjetor të 2013-s. /tesheshi.com/