Përditshmja Dita ka publikuar rastin e një hetuesi, në një inisiativë investiguese për një kategori shtetarësh në Drejtësi, të cilët janë plot dritëhije.
Si rast të parë ka marrë atë të Dritan Malajt, oficer i Policisë Gjyqësore në Prokurorinë e Tiranës. Malaj është emëruar në këtë detyrë në vitin 2016 me firmë të ish kryeprokurorit të dënuar Adriatik Llalla, në shkelje të plotë me ligjin.
Sipas ligjit të asaj kohe, që të emëroheshe Oficer i Policisë Gjyqësore duhet të kishe 5 vite pune si jurist. Dritan Malaj, i datëlindjes 12.10.1990, deri në momentin e emërimit si OPGJ kishte vetëm 4 vite eksperiencë pune pranë Autoritetit të Komunikimeve Elektronike dhe Postare (AKEP).
Dita shkruan se sikur të mos mjaftonte fakti që Dritan Malaj nuk përmbushte eksperiencën për t’u punësuar, ai ndërkohë ishte edhe aksioner në një shoqëri tregtare. Më konkretisht, në 10.03.2015, Dritan Malaj dhe shtetasi italian Giuseppe Colazzo themelojnë kompaninë COOLSERVICE ALBANIA dhe kuotat u ndanë 40 % për Dritanin dhe 60% për Giuseppen.
Ligji e ndalon që një Oficer i Policisë Gjyqësorë të jetë aksioner në shoqëri tregtare. Këtë gjë Dritani Malaj “e mësoi” dy vite me vonesë, dhe në datë 15.02.2017 transferoi 40% të kuotave të veta në kompani tek Stela Malaj që është bashkëshortja e tij, thuhet në investigimin e gazetës Dita.
Jeta luksoze e Dritan Malaj
Nga vendet egzotike e deri në vendet e ftohta; udhëtime luksoze të reklamuara edhe në rrjetet sociale. Pushimet në vende ekskluzive janë pasioni i Dritanit. Paga e tij si OPGJ është 102.800 lekë në muaj. Sa për të krijuar një ide, Dritani ka kaluar ditë të tëra pushimesh ne hotel Grotta Palazzese (foto lart) nje hotel ekskluziv në Polignano, ku gjysëm dite qendrimi kushton sa rroga e një OPGJ-je.
Për të mos numëruar ditët e panumërta ne plazhet e Amalfit, Saint Tropezit e deri në Spanjë. Si i paguan oficeri Dritan Malaj këto shpenzime në çdo cep të globit? Një llogari e thjeshtë nxjerr se rroga e tij nuk mjafton as për bileta avioni.
Gazeta Dita mëson se nëpër Tiranë, Dritan Malaj lëviz me një Range Rover me targa angleze, që u përket pronarëve të një bari të njohur, të cilët kanë qenë subjekt i hetimit të Prokurorisë dhe sot kanë studio ligjore mbrojtëse pikërisht “Malaj Loë Consulting and Partner” ose më saktë, kanë avokate mamanë e hetuesit të tyre!
Siç edhe e theksuam në hyrje të këtij cikli, rasti Malaj është vetëm një nga Oficerët e Policisë Gjyqësore të këtij kallëpi. Si rasti “Malaj” janë me dhjetra oficerë të tjerë për të cilët nuk është folur deri më sot, vijon artikulli investigues i gazetës Dita.
Interesant në këtë rast është naiviteti i hetuesit Malaj, cili edhe e bën publike jetën e tij luksoze. Pra, pos që mund të jetë i korruptuar, as nuk kujdeset ta fshehë rrezatimin e korrpusonit, por e shfaq atë lumturisht…dhe naivisht, sigurisht. /tesheshi.com/
