Nga Drilon Sylejmani
Edon Molla është ylli në ngritje në Ligën e Kolegjeve të basketbollit në Amerikë dhe shumë shpejt, djaloshin nga Ulqini mund ta shohim edhe në Ligën më të fortë të basketbollit në botë, NBA.
Edonin mund ta shohim edhe në Përfaqësuesen e Kosovës, tani pas pranimit në FIBA dhe kjo e bën edhe më të veçantë 21 vjeçarin i cili ka shprehur gatishmërinë që të kontribuojë për vendlindjen e familjarëve të tij.
Ne realizuam një bisedë me Edonin nga mësuam edhe shumë gjëra të reja, por fillimisht ju sjellim një autoportret të tij.
Kush është Edon Molla?
Edon Molla ka lindur në mars 1994 në Ulqin, Mal të Zi dhe ka prindër Xhavit Molla (mësues i sportit) dhe nëna Merita Xharra-Molla (ekonomiste). Babai i Edonit. z. Xhavit ka lindur në Ulqin dhe në moshën 14 vjeç u vendos në Gjakovë, për të ndjekur shkollën e mesme. Pastaj në moshën 18 vjeçare u transferua në Prishtinë, për të ndjekur arsimin e lartë në Universitetin e Prishtinës. Nëna e tij, Merita Xharra, ka lindur në qytetin historik të Prizrenit në Kosovë. Në verën e vitit 1989 prindërit e tij u martuan dhe para se të fillonte lufta në Kosovë, ato emigruan në Amerikë, kur Edoni ishte vetëm foshnje, bashkë me vëllanë Admirin. Të dy djemtë flasin shumë mirë gjuhën shqipen dhe krenohen me prejardhjen e tyre shqiptare.
Si i morri Edoni hapat e para, drejt fillimi të një karriere të suksesshme?
Nëna sigurisht, ajo më ka inkurajuar që të merresha me sport dhe ta kisha në të ardhmen si profesion Në moshën 8-vjeçare jam regjistruar në ekipin e St. Columba, ku kam avancuar shumë shpejt. Kur isha vetëm 13 vjeç, luajta në ndeshjen e parë të kampionatit. Edhe pse ekipi humbi lojën, unë morra shumë vëmendje nga trajnerë dhe shkolla të mesme që ishin shumë të interesuar për t`i pasur shërbimet e mia. Interesim kishte edhe nga mediat amerikane që filluan të shkruajnë për mua si talent të ri.
Sa ka ndikuar jeta në universitet e Amerikës në formimin e personalitetit dhe sportistit tek Edoni?
Në vitin 2009, vendosa të hyjë në shkollën e mesme mjaft të suksesshme “Shën Antoni”, që ka një nga ekipet më të mira të basketbollit të historisë amerikane. Njihet si më prestigjozja dhe më e mira në vend. Nën 40 vitet e fundit, trajneri legjendar që udhëheq ekipin, Bob Hurley ka thyer rekordin duke fituar 27 tituj, 17 turne të kampionateve dhe katër kampionate kombëtare, duke patur shtatë sezone fituese rresht të pathyeshme. Në vitin 2010, trajneri Bob Hurley u emërua dhe emri i tij u shtua në “Hall of Fame” të basketbollit.
Gjatë kohës në shkollën “Shën Antoni” (St. Anthony), kam patur një sukses të madh. Bashkë me ekipin e shkollës kemi fituar kampionatin e Neë Jerseit, si dhe turneun e titujve të kampionit kombëtar për SHBA-në. Gjatë katër viteve në Shën Antoni ka patur një rekord prej 127-5 dhe 66-0 në dy vitet e fundit. Vitin e fundit u zgjodha kapiteni i ekipit, një titull që iu më është dhënë nga trajneri legjendar Bob Hurley. Aty kam mësuar edhe shumë gjëra për jetën: të udhëtoj me kilometra për ta zhvilluar një ndeshje, të mësohem si të sillem në fushë dhe jashtë saj.
Pas pranimit në FIBA, Kosova ka nevojë për lojtarë cilësorë që mund ta sjellin përvojen dhe kualitetin, a është i gatshëm t’ia ofrojë Edoni vendit të tij këtë gjë?
Vëllai im ka kontaktuar me Federatën e Basketbollit të Kosovës për ta luajtur unë në Përfaqësuese. Kjo ka qenë ëndrra ime që nga fëmijëria. Këtu e kam punën dhe jetën, mirëpo zemra rreh për vendlindjen time, kështu që unë kam dëshirë të jem reprezentues i Kosovës.
‘Xharra Group’ ka investuar në organizimin një kamp të basketbollit për fëmijët dhe unë do të jem pjesë e asaj kampanje”.
Ardhja e mundshme në Kosovë a do ta afrojë Edonin më shumë drejt ndonjë skuadre evropiane, apo cilat janë planet e juaja për të ardhmen?
Preferoj të vazhdoj të ndjek ëndrrën time, që një ditë të luajë me lojtarët më të mirë në NBA, po të ardhmes nuk i dihet. Të shpresojmë!
/tesheshi.com/
