Rrjeti televiziv panamerikanolatin teleSUR zhvilloi këtë javë një intervistë ekskluzive me kreun e regjimit sirian.
Nga Damasku, aty ku Rolando Segura, intervistuesi i rrjetit teleSUR, e realizoi intervistën, është nënvizuar veçmas një fjali mes morive të çështjeve të diskutuara.
Bashar Assad-i ka përdorur ironinë kur ka dashur të përcjellë qëndrimin perëndimor ndaj tij, mënyrën si përshkruhet figura e tij në Perëndim, duke i thënë intervistuesit: “Po, nga një këndvështrim perëndimor, ju po qëndroni ulur me djallin!”
Njeriu në qendër të konfliktit të përgjakshëm gjashtëvjeçar në Siri ka diskutuar po ashtu në intervistë për Donald Trump-in, presidentin e ri amerikan, duke thënë se ai nuk ka politika, por vë në zbatim vendime që janë marrë nga agjencitë e inteligjencës, nga Pentagoni, nga prodhuesit e mëdhenj të armëve, nga kompanitë e naftës dhe nga institucionet financiare.
“Pikërisht prandaj është jorealiste dhe humbje e plotë kohe të bësh një vlerësim të politikës së jashtme të presidentit amerikan, sepse ai mund të thotë diçka, por bën në fund çka i diktojnë këto institucione. Kjo nuk është gjë e re. Kjo ka qenë për dekada politika e vazhdueshme amerikane,” i është shprehur Assad intervistuesit nga ana tjetër e botës.
Sa për sulmin me armë kimike në Han Shejhun në fillim të prillit, Assad-i nuk pranon asgjë, madje ka pohuar se qeveria e tij ka kërkuar hetim të pavaruar, të minuar nga SHBA-ja dhe aleatët e saj.
“Ne i kemi kërkuar Organizatës për Ndalimin e Armëve Kimike të dërgojë misione të specializuara për të hetuar atë që ndodhi. E çdo herë Shtetet e Bashkuara i bllokuan këto hetime apo e penguan dërgimin e misioneve të tilla.”
Ai ka shpjeguar dhe aleancën me Rusinë, posaçërisht në aspektin ushtarak.
“Terroristët, duke vepruar me udhëzimet izraelite, amerikane, turke, saudite dhe të Katarit, kanë shkatërruar disa prej këtyre sistemeve [të mbrojtjes raketore]. Dhe është e natyrshme për ne që të negociojmë me Rusinë për t’i forcuar tani këto sisteme, qoftë për të përballuar ndonjë kërcënim izraelit nga ajri, apo sulme të raketave amerikane.”
Në fund, një numër zhvillimesh ndërkombëtare janë shpjeguar nga Bashar Assad-i me synimin për rivendosjen e hegjemonisë amerikane.
“SHBA-ja kërkon gjithmonë t’i kontrollojë të tërë shtetet e botës pa përjashtim. Kjo është arsyeja se çfarë po ngjet me Sirinë, me Korenë, me Iraninë, me Rusinë, e madje tani dhe me Venezuelën, ka për qëllim riimponimin e hegjemonisë amerikane në botë, sepse ata besojnë se kjo hegjemoni është nën kërcënim tashmë.”
Retorika antiamerikane e Bashar Assad-it është gjithsesi e pamjaftueshme për të përligjur gjakun e mijëra sirianëve të vrarë në këto gjashtë vite konflikt, të mijëra të tjerëve të zhvendosur brenda vendit apo të larguar nga Siria. /tesheshi.com/
