Presidenti amerikan, Barack Obama pranon se mosmiratimi i ligjeve për rregulla më të ashpra në mbajtjen e armëve në Shtetet e Bashkuara është frustrimi më i madh i Presidencës së tij. Në një intervistë me BBC, Obama tha se ka qenë i stresuar që nuk ka arritur të bëjë progress për këtë cështje, edhe përballë masakrave të përsëritura.
Ai u zotua se do të vijojë të përpiqet, por si thotë redaktori i BBC-së, Jon Sopel që mori intervistën, presidenti nuk dukej shumë shpresëplotë.
Me vetëm 18 muaj të mbetur në krye të Shtëpisë së Bardhë, Obama thotë se kontrolli i armëve ka qenë pjesa që e ka frustruar më shumë që kur erdhi në pushtet në vitin 2009.
“Nëse sheh numrin e amerikanëve të vrarë që pas 11 Shtatorit nga terrorizmi, është më pak se 100. Nëse sheh numrin e atyre të vrarë nga dhuna e armëve, është me dhjetëra mijë”, tha Obama.
BBC thotë se disa orë pasi ishte dhënë kjo intervistë, një person i armatosur hapi zjarr në një kinema në Luiziana, duke vrarë dy njerëz e duke plagosur disa të tjerë para se të vriste veten.
Ndërkaq, Obama tha se marrëdhëniet mes racave gjatë Presidencës së tij, janë përmirësuar.
Në intervistën që mbuloi shumë pika, Obama shprehet gjithashtu për arsyet përse Britania e Madhe duhet të qëndrojë në BE, si mënyrë për të pasur ndikim në skenën botërore.
Ai shprehet i bindur se marrëveshja me Iranin do të kalojë provën e Kongresit, ndërsa për Sirinë thotë se duhet marrëveshje politike si mënyrë për të mposhtur Shtetin Islamik./tesheshi/
