Nga Donat Maloku
Drejtori i Agjencisë Kundër Korrupsionit, Hasan Preteni, në një intervistë ekskluzive dhënë për portalin “Te Sheshi”, thotë se ka dyshime për përfshirjen e shumë zyrtarëve të nivelit të lartë në vepra korruptive, në mesin e të cilëve janë edhe ministra. Ai shprehet se ka mungesë vullneti për ta luftuar këtë dukuri negative, derisa shton se mungesa e guximit po i zvarrit punët në sistemin e drejtësisë. Preteni thotë se secili nga zyrtarët e Gjyqësorit duhet të vlerësohet në periudha kohore dhe të gjithë ata që nuk i realizojnë normat e caktuara duhet të shkarkohen.
Preteni në këtë intevistë flet edhe për fushën e prokurimit, punën e Këshillit Kundër Korrupsion që udhëhiqet nga presidentja Atifete Jahjaga dhe për kryeprokurorin e shtetit Aleksandër Lumezi.
Korrupsioni në Kosovë është kanceri më i madh që po e shkatërron vendin që nga paslufta. Cila është strategjia e AKK-së për ta luftuar këtë dukuri negative?
Preteni: Mbetet konstatimi se nuk po luftohet korrupsioni në masën e duhur. Kosova i ka të gjitha institucionet që kanë për mision luftën kundër korrupsionit edhe legjislacioni është gati i kompletuar, por ka mungesë të vullnetit që të zbatohet legjislacioni në fuqi. Nuk ka llogaridhënie dhe transparencë, mungesa e tyre rezulton me korrupsion.
Ku mendoni se janë duke ngecur punët në sistemin e drejtësisë për lëndët që kanë të bëjnë me korrupsionin?
Preteni: Mungesa e guximit dhe kurajës për trajtimin e lëndëve të ndijeshme.
Sa kallëzime penale ka ngritur Agjencia në gjashtë mujorin e këtij viti. Sa raste të nivelit të lartë jeni duke i hetuar?
Preteni: Agjencia ligjërisht i publikon të gjitha vendimet-opinionet që kanë të bëjnë me: deklarimin e pasurisë parandalimin e konfliktit të interesit dhe parandalimin e korrupsionit në fushën e prokurimit publik, kallëzimet penale si dhe emrat e personave të përfshirë në kallëzimet penale nuk bëhen publik, këta emra janë të njohur vetëm për Prokuroritë. Agjencia kryen hetime preliminare-administrative dhe të gjitha provat i përcjellë tek Prokuroritë kompetente për procedim të mëtutjeshëm, është çështje e Prokurorisë se a do të vazhdon me hetime penale apo jo.
A ka ndonjë rast të ndonjë ministri të Qeverisë që është duke u hetuar në bazë të informatave që i keni dërguar ju në Prokurori?
Preteni: Raste kemi dërguar, ka dyshime për përfshirjen e shumë zyrtarëve të nivelit të lartë, pra edhe të ministrave.
Cili është rekomandimi juaj për Qeverinë, Prokuroritë dhe Gjykatat për të luftuar korrupsionin?
Preteni: Për Qeverinë: Të ndryshohet-amandamentohet Ligji për parandalimin e konfliktit të interesit, në mënyrë specifike me ligj duhet të rregullohet punësimi i shumëfishtë, për Prokuroritë dhe Gjykatat, më shumë transparencë dhe llogaridhënie, aktakuzat dhe aktgjykimet të bëhen publike. Secili nga zyrtarët e ‘Gjyqësorit’ duhet të vlerësohet në periudha kohore dhe të gjithë ata që nuk i realizojnë normat e caktuara duhet të shkarkohen.
Fusha më e ndjeshme është prokurimi. A po heziton qjyqësori të merret me rastet korruptive?
Preteni: Fusha që në vazhdimësi po reflekton-prodhon korrupsion është fusha e prokurimit publik, tenderomania, rastet kur pak persona më pak rrezik për një kohë të shkurtër po fitojnë shumë.
Si e vlerësoni punën e Këshillit kundër Korrupsion?
Preteni: Këshilli kundër Korrupsion, është jo shumë i suksesshëm, ideja ishte e mirë por…
Para pak muajsh AKK ka publikuar formularët e pasurisë së zyrtarëve të shtetit. Disa OJQ publikimin e listave e kanë vlerësuar ‘Sa për sy e faqe’, duke thënë se shumë zyrtarë nuk e kanë deklaruar drejt pasurinë dhe të njëjtit nuk janë hetuar fare nga AKK. Cili është qëndrimi juaj?
Preteni: Ne po i kontrollojmë 20% të formularëve dhe të gjithë formularët për të cilët po paraqiten dyshimet. Inkurajoj të gjithë qytetarët dhe Organizatat Jo Qeveritare që të kontribuojnë në këtë drejtim. Kritikat paushallë nuk janë të bazuara, duhet të informohet Agjencia për të gjitha dyshimet. Vitin e kaluar është pranuar vetëm një informatë për dyshimet se nuk është deklaruar pasuria në tërësi vetëm për një person zyrtarë, Mbetet që pjesa e vërtetimit të prejardhjes së pasurisë të vërtetohet por për këtë po mungon baza juridike, Nuk ka bazë juridike për vlerësimin e prejardhjes së pasurisë.
Kryeprokurori i ri i shtetit, Aleksandër Lumezi ka dhënë fjalë të forta në luftën anti-korrupsion që në momentin e emërimit. Si e vlerësoni punën e deritanishme?
Preteni: Sa i përket Kryeprokurorit të ri, unë jam optimist se do të ketë progres.
/tesheshi.com/
