Nga Blendi Gashi
Kryeministri Isa Mustafa, do të paraqitet të enjten në interpelancë para deputetëve për të raportuar për situatën aktuale në pjesën veriore të Kosovës, pasi një gjë të tillë e ka kërkuar deputetit i Vetëvendosje-s, Ismajl Kurteshi, i mbështetur edhe nga 10 deputetë të tjerë.
Pavarësisht deklarimeve që pritet të bëjë shefi i qeverisë së Prishtinës, një fakt i pamohueshëm është se qeveria që udhëheq ai nuk ka bërë asgjë që veriu të integrohet dhe deri më tani nuk ka krijuar kushte që banorët shqiptarë të Mitrovicës të kthehen në pronat e tyre në veri, gjë që nuk e bëri as ish-qeveria “Thaçi” gjatë dy mandateve.
Përveç kritikave për mosintegrim të veriut, një pyetje që mund të shtrohet nga deputetët për kryeministrin është pse ende ai nuk e ka vizituar veriun e Kosovës, edhe pse ka kohë që ka paralajmëruar se do të shkojë atje?
Premtimin se do vizitojë në komunat veriore, Mustafa e bëri gjatë një vizite në komunën e Kamenicës në prill, ku përmendi se një vizitë të tillë synon ta bëjë muajin në maj, por që një gjë e tillë nuk ndodhi.
“Unë mund të them se datën nuk mund ta them, por shpejtë do të ndodhë vizita në veri dhe Leposaviq, dhe në këto tre komunat e veriut të vendit. Unë jam në kontakte, së paku javore me kryetarët e komunave atje, është një përparësi e cila mendoj se duhet të vlerësohet, se ata po i respektojnë të gjitha rregullat që i ka vënë edhe Kuvendi i Republikës së Kosovës, qeveria, Ministria e Financave, sa i përket buxhetit, dhe sa i përket rregullave të tjera. Do të merremi vesh me ta, do të vizitojmë ato komuna, do të vizitojmë edhe projektet në të cilat ne po investojmë tani atje”, deklaroi Mustafa në muajin qershor.
Por, edhe tre muaj pas këtyre deklarimeve, Mustafa ende nuk ka shkelur në veri dhe për më tepër nuk dihet se kur do të ndodh një vizitë e tillë.
Pavarësisht vizitës apo jo në veri të Mitrovicës, kryeministri Mustafa në seancën e së enjtes t të kritikohet ashpër nga partitë opozita për mos shtrirjen e sovranitetit në veri.
Deputeti i Vetëvendosje-s. Ismail Kurteshi, inicues i interpelancës ka treguar për portalin tesheshi.com se cilat do të jenë disa prej kërkesave për qeverinë për çështjen e veriut.
Ai ka bërë të ditur se pas debatit që do të zhvillohet nga deputetët, pra në fund të interpelancës do të kërkohet miratimi i një rezolute, ku një prej kërkesave do të jetë që institucionet e vendit ta shtrijnë autoritetin edhe në pjesën veriore të Mitrovicës.
“Kryeministri është përgjegjës ta shtrij pushtetin edhe në atë pjesë të vendit në aspketin administrativë, të pengoi disa çështje dhe të mundësoi disa çështje tjera, si shembull të mundësoi lëvizjen e lirë të qytetarëve. Pas debatit nga deputetët që janë inicues të intereplancës do të kërkohet miratimii i një Rezolute që parasheh detyra konkrete për qeverinë. Nëse Kuvendi e miraton atëherë natyrisht qeveria është e obliguar ta zbatojë rezolutën edhe pse kjo qeveri është e njohur për mos zbatimin e rezolutave të kuvendit të cilt janë obligime. Se çfarë parasheh rezoluta nuk mund ta them por një gjë e tillë do të bëhet publike në seancën e së enjtes”, ka thënë Kurteshi, për tesheshi.com.
I pyetur si e vlerëson mos shkuarjen e kryeministrit Mustafa ende në veri, deputeti Kurteshi ka deklaruar se vizita apo jo e tij nuk ka aq rëndësi të madhe, por e rëndësishme është që pushteti të shtrihet në Mitrovicën veriore.
“Shkuarja e kryeministrit në veri më shumë ka karakter simbolik edhe pse nuk them që është e krejt e parëndësishme, por veprimet e qeverisë dhe prezenca e institucioneve të Kosovës atje janë më të nevojshme se vizitat që mund të jenë të momentit”, ka thënë Kurteshi, për tesheshi.com.
Se kur pritet ta vizitojë kryeministri Mustafa veriun e vendit, tesheshi.com ka tentuar të marrë një përgjigje nga Bajram Gecaj që është këshilltar i kryeministrit, por ai nuk është përgjigjur në pyetjen e dërguar.
Siç dihet, vizita në veri nga kabineti “Mustafa” kanë realizuar ministri Arban Abrashi dhe zëvendësministrat, Nehat Mustafa e Bajram Gecaj, ndërsa deputetja e PDK-së, Ganimete Musliu ka vizituar veriun tre herë në katër muajt e fundit, me angazhime zyrtare.
Ndërsa ministri i Financave, Avdullah Hoti, më 18 nëntor të vitit të kaluar nuk u lejua të vizitoi komunat veriore pasi iu pamundësua kalimi përmes Zveçanit nga një grup serbësh. /tesheshi.com/
