Interi u kthye duarbosh nga Xhenova, ku humbi 1-0 ndaj Sampdorias në mbrëmjen e vonë të së dielës. Kjo ishte humbja e pestë e Interit në njëmbëdhjetë javë të kampionatit italian. Në vend të 11-të në klasifikim, për Interin duket e largët dita kur mposhti Juventusin, një fitore e pasuar nga rezultate aspak të kënaqshme.
Në një ndeshje deri diku të barabartë, Interi e pësoi nga një gol i Quagliarella-s në mbarim të pjesës së parë. As përpjekjet e 45 minutave të dyta nuk mundën t’i barazpeshojnë së paku shifrat.
Tekniku holandez, Frank de Boer, ia vë fajin mendësisë së ekipit.
“Ne nuk luajtëm fare në pjesën e parë. Në pjesën e dytë shprehëm futbollin tonë të vërtetë, por nuk mund ta kuptoj pse ngjan të mos jemi në gjendje të luajmë ashtu siç duam për më shumë se 45 minuta. Nuk shoh një ekip me vetëbesimin për t’i fituar sfidat. Kjo është vetëm një çështje mendësie. Ne kemi shumë cilësi, por nuk mund të bëjmë shumë kur kemi mendësinë që pashë në pjesën e parë,” u shpreh ai pas humbjes.
De Boer është në prag të shkarkimit, por besohet se atij do t’i jepet kohë dhe këtë javë, në fund të së cilës Interi do të luajë ndaj Krotones. Pas kësaj vjen një ndërprerje e kampionatit, për shkak të aktivitetit të përfaqësueseve, kohë gjatë së cilës besohet se do të shihet se çfarë do të ngjasë me holandezin.
Leonardo flitet se është më i parapëlqyeri për të marrë drejtimin e Interit, aq më tepër që ai ka përvojë në drejtimin e përkohshëm të skuadrës. Megjithatë, përmenden gjithashtu mes emrave pretendentë dhe Laurent Blanc, Andrea Mandorlini, Guidolin e Stefano Pioli. /tesheshi.com/
