Dy prej rezultateve më të papritura të 24 ndeshjeve të Ligës së Europës, të luajtura mbrëmjen e së enjtes, qenë humbjet e Interit dhe Nisës.
Pavarësisht paraqitjeve të mira në kampionatin italian, Interi ka pësuar humbjen e dytë në ndeshjen e dytë në Ligën e Europës. Në Pragë, ndaj Spartës vendase, italianët janë mundur 3-1, duke qenë skuadra e vetme me 0 pikë në grupin K.
Humbje, madje e thellë, dhe për Nisën, kryesuesen e kampionatit francez. Balotelli ka shënuar njërin prej golave në humbjen 5-2 ndaj Krasnodarit. Dhe Nisa ka 0 pikë në grupin I, por ngushëllimi i saj i vetëm është se bashkëshoqërohet nga Salcburgu, po me 0 pikë.
Veç fitores së Krasnodarit, dy fitore të tjera të thella kanë ardhur nga dy skuadra italiane. Roma ka mposhtur 4-0 Astrën, ndërsa Fiorentina ka fituar 5-1 ndaj Karabakut të Ansi Agollit.
Zyrihu ka marrë tre pikët e para, duke fituar 2-1 ndaj Osmanllësporit. Burim Kukeli është aktivizuar gjatë gjithë lojës, kurse Sadiku nuk ka qenë as në stol i pranishëm.
Viktoria Plzen mori një pikë në transfertën ndaj Austrisë së Vjenës. Ergys Kaçe u aktivizua gjatë gjithë lojës në barazimin 0-0, për t’u zëvendësuar vetëm në minutën e 92-të.
Mançester Junajtedi ka shpëtuar nderin e vet, duke fituar minimalisht 1-0 ndaj Zorya Luhanskut ukrainas. Goli i vetëm është shënuar nga Ibrahimovic 21 minuta para mbarimit të lojës.
Skuadra ruse e Zenitit ka dërrmuar holandezët e AZ Alkmarit, duke fituar 5-0. Fitore ka patur dhe për Ajaksin, Selta Vigon, Shakhtarin e Donjeckut, Shalken, Atletik Bilbaon e Fenerbahçen. /tesheshi.com/
