Më shumë se e dobët ka qenë sot paraqitja e Interit ndaj Kaljarit.
Në “Giuseppe Meazza” është parë një Inter pa nerv, pa ide, pa impulsin e duhur që të çon te fitorja.
Që prej fitores ndaj Juventusit, në vend që të mëkëmbet, Interi ka nisur një tjetër tatëpjetë, duke mos fituar që nga 21 shtatori. Humbja e sotme ka qenë e dyta rresht, pas asaj ndaj Romës.
Interi ka humbur 1-2 me Kaljarin, duke rrëshqitur në vend të njëmbëdhjetë në renditje, me vetëm 11 pikë, dhjetë më pak se kryesuesit e Juventusit.
Sinjalin e një pasditeje jo të mirë e dha fillimisht Ikardi, që në pjesën e parë gjuajti tmerrësisht keq një 11-metërsh. Megjithatë, Joao Mario i dha një avantazh të përkohshëm Interit dhjetë minuta pas nisjes së pjesës së dytë.
Kaljari barazoi me anë të Melchiorri-t në minutën e 71-të, e pesë minuta para fundit të lojës mori epërsinë me autogolin e Handanovic-it.
Humbja 1-2 nuk u shmang as pa presionit të çasteve finale.
Pasdite e vështirë ka qenë dhe për Lacion në përballjen me Bolonjën. Strakosha ishte ulur në stol, për t’ia lënë detyrën e mbrojtjes së portës Marchetti-t. Por Lacio pëson shpejt gol, në minutën e dhjetë. Helander shënon për miqtë. Barazimi ka ardhur vetëm në minutën e 97-të. Immobile ka kthyer në gol një 11-metërsh.
Lacio dhe Bolonja janë ndarë në barazim 1-1. Lacialët kanë humbur një mundësi të mirë për të parakaluar Napolin në renditje.
Në takimet e tjera të javës së tetë të Serisë A, Fiorentina – Atalanta dhe Xhenova – Empoli janë mbyllur pa gola, 0-0. Sasuolo ka fituar 2-1 ndaj Krotones.
Në mbrëmje luhet Kievo – Milan, dhe java mbyllet me takimin Palermo – Torino, të lënë për të hënën. /tesheshi.com/
