Presidenti Meta ka ofruar një tjetër deklaratë kontraverse, kësaj here duke ironizuar vetë zyrtarin e lartë amerikan, Matthew Palmer, i cili tha gjatë një interviste të dy ditëve më parë se “Shtetet e Bashkuara nuk po mbajnë anë në mosmarrëveshjet politike të Shqipërisë”.
Meta e nis statusin e tij me një përjetim individual, jashtë kostumit zyrtar, për t’u lëshuar më pas në një politikë të pastër, edhe me goditje ndaj asaj të Uashingtonit.
“Mirëmëngjes të dashur miq! Pas një terapie me ujë bore, më lindi një pyetje që dua ta ndaj me ju, dhe që u drejtohet atyre të cilët bëjnë si të paanshëm, pasi kanë shkëlqyer me njëanshmërinë e tyre, duke ia kaluar dhe Kryeministrit tonë, i cili në fund të fundit përfaqëson një anë politike:
Pse nuk keni sy për të parë apo veshë për të dëgjuar zgjidhjen e krizës që ka dhënë një institucion që ekziston, por ia kërkoni zgjidhjen një institucioni që nuk ekziston, falë edhe paanësisë tuaj tepër të vonuar?”, shkruan Meta.
Po cili është institucioni që ekziston dhe ai që nuk ekziston. I pari është ai pra, Presidenti, ndërsa i dyti, inekzistenti, Gjykata Kushtetuese, për të cilën SHBA ka këshilluar që të pritet riformimi i saj, për t’u përcaktuar më pas ligjshmëria ose jo e 30 Qershorit.
Meta më pas vijon t’i mëshojë tezës së tij se 13 Tetori që ofron si datë zgjedhjesh është dhe kusht për hapjen e negociatave, ndonëse asnjë zë ndërkombëtar nuk e ka thënë këtë, ashtu siç dhe asnjë zë ndërkombëtar nuk e la përfilluar, madje as me komente, 13 Tetorin e presidentit.
“Kaq të domosdoshëm e keni dështimin e çeljes së negociatave për vendin tonë në 18 tetor?”, shkruan Meta, duke aluduar kështu se SHBA mund të bëhen shkak për mos’hapje negociatash. /tesheshi.com/
https://www.facebook.com/ilirmetazyrtar/videos/418132678797083/?t=3
