Presidenti turk Rexhep Tajip Erdogan dhe zonja e parë Emine Erdogan rezultuan pozitiv me COVID-19 me simptoma të lehta, njoftoi të shtunën llogaria personale e presidentit në Twitter.
Erdogan do të merrte pjesë në një ceremoni inaugurimi në Zonguldak të Turqisë veriore të shtunën, por në vend të kësaj, ai mori pjesë në të përmes videokonferencës më herët gjatë ditës.
Erdogan tha se duhej të anulonte vizitën e tij për shkak të të ftohtit dhe problemeve me ngjirjen e zërit. Menjëherë më pas u bë e ditur se çifti ka kontraktuar variantin Omicron.
“Ne jemi në detyrë. Ne do të vazhdojmë punën tonë nga shtëpia. Nevojë për lutjet tuaja”, thuhet në mesazhin në Twitter.
“Shpresoj ta kapërcejmë këtë sëmundje sa më shpejt të jetë e mundur së bashku me bashkëshortin Tajjip. Presim lutjet tuaja,” shkroi në Twitter bashkëshortja e tij 66-vjeçare, Emine Erdogan.
Presidenti turk mori dozën e tretë të vaksinës në qershor të vitit të kaluar, ndërsa në janar mori dozën e parë publikisht për të inkurajuar një fushatë vaksinimi mbarëkombëtare. Ai pritet të mbushë 68 vjeç.
Presidenti Erdogan do të pushojë në rezidencën e tij në Stamboll për një javë përpara se t’i nënshtrohet një testi të dytë, tha një këshilltar për Deutsche Presse-Agentur (dpa) me telefon. Ndërkohë, ai do t’i bashkohet ngjarjeve përmes videokonferencës nëse duhet, shtoi këshilltari.
Kreu i opozitës kryesore të Partisë Popullore Republikane (CHP) Kemal Kılıçdaroğlu dhe politikanë të tjerë i uruan Erdoganit dhe gruas së tij që t’a kalojnë lehtë këtë sprovë shëndeti, nga e cila po vuan globi prej gati dy vitesh. /tesheshi.com/
