Shtretër dhe mjekë të pamjaftueshëm dhe një rritje masive e të infektuarve me COVID kanë sjellë spitalet në Ballkan në prag të kolapsit, ku skenat kaotike u kujtojnë disa punonjësve të shëndetit luftërat e viteve 1990, shkruan AFP.
Pasi virusi ishte pak a shumë nën kontroll për gati një vit, skenari i zi nga i cili Ballkani kishte frikë që nga fillimi i pandemisë u bë i vërtetë.
Në Bosnjën e goditur rëndë, një mjek i tha AFP se ai duhej të “zgjidhte” midis disa pacientëve, jeta e të cilëve është pezull.
“Situata më kujton luftën dhe kam frikë se do të përkeqësohet më shumë gjatë dimrit,” tha mjeku, i cili dëshironte të mbetej anonim.
“Ne mund të bëjmë punën e tre personave, por jo të pesë”.
Ballkani Perëndimor, një nga qoshet më të varfëra të Evropës, po lufton me një shpërthim të virusit për javë të tëra. Numri i të vdekurve është dyfishuar në muajin e kaluar, duke arritur gati 10,000, shkruan AFP.
Kriza ekspozon boshllëqet në sistemet shëndetësore që kërcënohen nga financimi i dobët dhe një krizë e ikjes së trurit. Mjekë dhe infermierë të rinj premtues shkojnë jashtë vendit në kërkim të pagave dhe arsimimit më të mire, vijon më tej të komentojë agjencia franceze.
Para pandemisë, Ballkani kishte numrin më të ulët të mjekëve për frymë në Evropë, sipas Organizatës Botërore të Shëndetësisë (OBSH).
Spitalet tani përballen me një numër edhe më të vogël të stafit, pasi edhe ata bien viktimë e infektimit.
Në Serbi, rreth 2,000 punonjës shëndetësorë janë të detyruar të shkojnë në vetë-izolim, ndërsa në të njëjtën kohë një numër i madh pacientësh mbushin shtretërit spitalorë në kryeqytetin Beograd.
Bosnja, Maqedonia Veriore dhe Mali i Zi janë në dhjetë vendet e para evropiane me nivelet më të larta të vdekjeve për frymë.
Por qeveritë në rajon nuk duan të kthehen në mbylljet drastike si në fillim të pandemisë. Në vend të kësaj, ata kanë vendosur për kufizime të vogla si mbylljet e hershme të restoranteve.
Ndërsa Serbia nxiton të ndërtojë dy spitale të reja, Kosova po konsideron përshtatjen e hoteleve të vjetra në pavijone të improvizuara, përfshirë Grand Hotel në Prishtinë.
Spitalet e mbushura me njerëz në Prishtinë do të thotë që disa pacientë, të tillë si Veprim Morina 33-vjeçar, nuk mund të pranohen.
“Mjeku më tha të merrja terapi në shtëpi sepse spitalet janë plot”, tha ky trajner fitnesi për AFP.
Morina arriti të “punësojë” një infermiere për t’u kujdesur për të në shtëpi, një mundësi që ata që mund ta përballojnë, e zgjedhin si zgjidhje.
“Miqësitë” tani janë të nevojshme për të marrë një shtrat spitali, tha Morina.
“Duhet të jesh me fat për të gjetur një vend”.
Në Maqedoninë Veriore fqinje, qeveria po u drejtohet klinikave private që mund të pranojnë pacientë me COVID, pasi të gjithë spitalet publike janë të mbushura.
“Ne po sigurojmë shtretër të rinj, por po bëhet gjithnjë e më e vështirë,” tha ministri i Shëndetësisë Venko Filipcve javën e kaluar.
Në spitalet jashtë kryeqytetit Shkup, familja dhe miqtë u sjellin pacientëve ushqim dhe ndonjëherë ilaçe, shkruan AFP.
“Fatkeqësi. Të paorganizuar. Askush nuk përgjigjet në telefon për orë të tëra”, tha një burrë që përpiqej të merrte informacione për kushëririn e tij të sëmurë.
“Ata (stafi mjekësor) po luftojnë, duke dhënë më të mirën e tyre, por ata thjesht nuk mund të bëjnë gjithçka.”
Mjekët kroatë paralajmëruan gjithashtu për mungesën e stafit dhe pajisjeve.
Aktualisht, më shumë se 2,200 pacientë janë të shtruar në Kroaci dhe 3,000 pacientë do të shtyjnë sistemin shëndetësor në “kolaps”, thanë ata, shkruan AFP.
Ekspertët thonë se politikanët po përpiqen të mbajnë një ekuilibër midis kontrollit të virusit dhe mbrojtjes së ekonomisë së brishtë.
“Ne jemi shumë të varfër që gjithçka (masat e mbylljes) të përsëriten dy herë,” i tha AFP ekonomisti kroat Ljubo Jurçiç.
Në Bosnje, dyqanet, restorantet dhe palestrat mbeten të hapura, ndërsa Serbia ka shkurtuar orët e punës për ndërmarrjet.
Ndërsa përparimet në zhvillimin e vaksinave u japin mjekëve shpresë, ata kanë frikë nga kaosi që mund të shpërthejë ndërkohë.
“Nuk e kuptoj pse autoritetet nuk po futin masa më të rrepta,” tha Jasmina Smajiç, një mjeke nga Tuzla.
“Diçka duhet të bëhet nëse duam të parandalojmë pasojat katastrofike.” /tesheshi.com/
