Ekipet indoneziane të kërkimit do t’u japin fund përpjekjeve për gjetjen e viktimave të përplasjes së avionit të kompanisë AirAsia dhjetorin e vitit të kaluar, ndërsa mungojnë ende 56 trupa.
Dhënia fund kërkimeve ishte lënë për të martën, dhe të katër anijet e përfshira në aksion do të kthehen sot në Xhakarta.
Numri i trupave të gjetur është 106, me tre të fundit të pikasur të shtunën.
Rënia e avionit të kompanisë AirAsia ndodhi më 28 dhjetor 2014, pas një kohe me stuhi, dhe të 162 personat në bord humbën jetën. Avioni qe nisur nga qyteti indonezian i Surabajës drejt Singaporit, por fluturimi QZ8501 nuk përfundoi mirë fatkeqësisht.
Në kërkime u përfshinë fillimisht një sërë vendesh, por gjatë javëve të fundit pati një tërheqje të një pjese të mirë të anijeve të huaja, si dhe të ushtrisë indoneziane, që kishte siguruar pjesën më të madhe të pajisjeve dhe personelit.
Agjencia civile indoneziane e kërkimit i pati vijuar megjithatë përpjekjet, por në një shkallë më të vogël, dhe ekipet kishin gjetur hera-herës trupa dhe mbetje të avionit.
Vendimi për mbylljen e kërkimeve erdhi pasi drejtuesi i kompanisë AirAsia sinjalizoi javën e shkuar se operacioneve po u vinte fundi.
Kutia e zezë e avionit është gjetur, dhe Indonezia pritet ta nxjerrë në gusht raportin përfundimtar mbi përplasjen. /tesheshi.com/
