Media gjermane, më saktë Der Spiegel, shkruan mbi një incident në një avion të Lufthansa-s, që ka patur si protagonist kryeministrin Rama.
Thuhet se kreu i qeverisë shqiptare refuzoi të mbante një maskë mjekësore mbrojtëse përpara nisjes së një avioni nga Frankfurti për në Detroit, saqë ekuipazhi i kabinës duhej të thërriste kapitenin për ndihmë. Kjo ka ndodhur jo tani por dhjetorin e shkuar.
“Shefi i Lufthansa-s, Carsten Spohr, së fundmi e përmendi incidentin në një intervistë në Spiegel”, shkruan kjo e fundit. “Edhe pse shefi i linjës ajrore nuk e përmendi emrin Ramas, ai theksoi se nuk kishte asnjë trajtim preferencial kur bëhej fjalë për detyrimin për të mbajtur maskë – as për një kryetar qeverie”, shkruan Spiegel.
Por njeriu mediatik pranë Ramës, Endri Fuga, ofroi një tjetër version.
“Lajm i vjetër, për një incident që në thelb nuk kishte vendosjen e maskës, por sjelljen e pahijshme të njërit prej anëtareve të ekuipazhit. Ndjesa e kompanisë u pranua që atë dite”, shkruan ai, duke publikuar dhe tekstin e ndjesës.
“Shkëlqesi, në emër të Lufthansa German Airlines’, ju kërkojmë ndjesë që ju dhe familja juaj jeni larguar nga fluturimi LH442 i Lufthansa nga Frankfurt në Detroit më 3 dhjetor 2021 dhe na vjen shumë keq për çdo shqetësim që ju kemi shkaktuar. Ne ju kërkojmë ndjesë veçanërisht juve dhe familjes suaj, nëse sjellja e disa anëtarëve të ekuipazhit u perceptua si e papërshtatshme dhe nuk u trajtua me ndjeshmërinë dhe maturinë e nevojshme”. /tesheshi.com/
