Votat e fundit nga zgjedhjet e 6 tetorit ishin gati t’u bashkëngjiteshin rezultateve zyrtare, për t’i dhënë fund numërimit dhe për t’i hapur rrugë shpalljes zyrtare të fituesit nga ana e Komisionit Qendror të Zgjedhjeve.
Por zarfat “e helmuar” me vota që vinin nga votuesit legjitimë në Serbi, jo vetëm që ndaluan procesin e numërimit por nxitën frikë dhe pasiguri.
Nëntë persona, nga 26 që kanë kërkuar ndihmë mjekësore, janë hospitalizuar në Qendrën Klinike Universitare të Kosovës. Dy nga të helmuarit janë gra shtatzëna që po vuajnë nga të vjellat, enjtja e gjymtyrëve dhe reaksione në lëkurë.
Vëzhguesi i organizatës “Germin”, Shpëtim Shujaku, ka thënë, se 26 zyrtarët e KQZ-së, në momentin që kanë hapur zarfet, kanë filluar me pas reaksione, disa kanë pas skuqje në dorë, kruarje dhe disa shenja për rreth syve.
“Në momentin që janë hap këto zarfe kanë pas një erë shumë të rënd dhe kanë kundërmuar dhe pastaj me vazhdimin e procesin kur kanë hap , disa prej zyrtarëve të KQZ që kanë pas kontakt fizik me këto zarfe kanë filluar me pas reaksione, disa kanë pas skuqje në dorë, kruarje dhe disa shenja për rreth syve”, tha ai për Kosova Press.
Megjithatë zyrtarët shëndetësorë, ende nuk kanë bërë të ditur se për çfarë reaksioni alergjik bëhet fjalë. Qendra Klinike Universitare e Kosovës ka thënë se jeta e zyrtarëve të KQZ-së, nuk është në rrezik, por që rezultati i analizave toksikologjike do të publikohet më së largu në mbrëmje.
Lidhur me rastin e sotëm të kanë raportuar edhe agjencitë botërore të lajmeve, mes tyre Associated Press.
Nga ana tjetër, helmimi i zyrtarëve të Komisionit Qendror të Zgjedhjeve gjatë numërimit të votave, pas hapjes së zarfeve të ardhura nga Serbia, nga eksperti i sigurisë Avni Islami po konsiderohet si një sulm kimik-biologjik ndaj një institucioni, por edhe vetë Kosovës.
Islami ka thënë se “letrat helmuese, të ardhura nga Serbia dhe gjithçka e keqe që vjen nga ky shtet nuk do të duhej të ishin befasi. Ai shtoi se Agjencia Kosovare e Inteligjencës (AKI) si dhe gjitha institucionet e sigurisë, duhet të jenë në alarm 24 orë.
Eksperti i sigurisë thotë se ky rast ia kujton luftën e teroristëve me ‘zarfet e antraksit’ drejtuar edhe shefave të shteteve për helmim ose edhe shpërthim të këtyre letrave.
Për ata që kanë përjetuar fillimin e viteve 90’ si nxënës në Kosovë, helmimi i djeshëm kujton një ngjarje që vështirë se është fshirë nga kujtesa e tyre.
Në marsin e vitit 1990, nisën helmimet me gazra toksike, me qëllim të shfarosjes së të rinjve nga jo vetëm nga shkolla, por edhe nga jeta. Në ngjarjet që nuk morën vëmendje mediatike për shkak të rrethanave izoluese, u helmuan me mijëra të rinj, kryesisht nxënës të shkollimit fillor, e të mesëm, por në mesin e tyre kishte edhe foshnje në kopsht.
Në marsin dhe prillin e vitit 1990, më shumë se 7 mijë fëmijë shqiptarë të shkollave të Kosovës kërkuan ndihmën mjekësore nëpër qendrat mjekësore të Kosovës dhe ambulanca të improvizuara me shenja helmimi. Mjekët serbë në disa spitale refuzonin që të pranonin fëmijët e helmuar.
Qeveria jugosllave asokohe doli me kumtesë zyrtare se në Kosovë nuk kishte helmim, por se e gjithë kjo ishte një “histeri kolektive nga disa aktorë”.
Për rastësi apo për zakon, historia e djeshme, po interpretohet ngjashëm nga autoritetet në Serbi. /tesheshi.com/
