Lëvizja BESA dënoi incidentet e ndodhura gjatë ditës së sotme, duke theksuar se ato po shkaktohen nga një parti politike, e cila ka filluar të ndjejë humbjen dhe për këtë arsye po tenton të dëmtojë proçesin zgjedhor.
“Ndonëse deri më tani janë shënuar incidente të natyrave të ndryshme, siç është rasti i mbylljes së dy qendrave të votimit në Gostivar, kërcënimet e disa vëzhguesve tanë dhe tentimin për të blerë vota në komunën e Sarajit, parregullsi në disa vendvotime në komunën e Butelit, tentativa për krijimin e incidenteve në komunën e Çairit, reagimi i organeve të rendit të paktën deri më tani, të bën të kuptosh se nuk do të lejohet dëmtimi i këtij proçesi zgjedhor”, tha Faton Fazliu, zëdhënës në Lëvizjen BESA.
Fazliu tha se kanë informata të sigurta për tentativa të ndryshme kriminale, që përpiqen t’i bëjnë grupe dhe banda të një partie, e cila njihet për këtë mënyrë të veprimit.
Ai shtoi se veprimet e këtyre grupeve kanë hasur në rezistencën e popullatës, e cila është duke iu përgjigjur pozitivisht daljes në zgjedhje.
“Sot qytetarët marrin të ardhmen në duart e tyre, ndaj duhet që të gjithë të dalin dhe të japin votën e tyre, sepse vota e çdo qytetari është zëri i tij”, tha Fazliu. /tesheshi.com/
