Zv/ministrja e Rendit Rovena Poda, tha se më e rëndësishme në këto orë të nxehta të përplasjeve polici-militantë në KZAZ, është evitimi i çdo pasoje njerëzore.
“Në protesta kanë qenë turma shumë të mëdha dhe të dhunshme. Strategjia e Pplicisë së Shtetit është ‘zero viktima’. Jo gjithçka mund të arrihet me forcë. Policia ulet me palët për të qetësuar gjakrat, për ti thirrur logjikës. Këto janë mënyra strategjike të policisë për të qetësuar situatën, për t’i dhënë kohë policisë për të kaluar në një plan tjetër, por ndoshta edhe për t’i thirrur logjikës së ftohtë të palës tjetër. Viktima mund t’i duhet PD-së e cila është pa kauzë, ose me një kauzë që po shkon drejt dështimit”, tha ajo për Report Tv.
Sakaq, bëri me dije se ekziston një plan masash për 30 qershorin.
“Edhe nëse ndodh situatë e rënduar, policia ka një plan operacional. Kemi profesionistë dhe njerëz të zotë që kanë punuar me vite. Plani operacional ekskluzivisht zbatohet në terren dhe nuk mund të japë detaje. Është bërë plan për ndarjen e tyre në zona të nxehta. Do të ketë efektivë policie edhe të departamenteve të tjera që do të angazhohen për ruajtjen e KZAZ-ve”, tha Poda. /tesheshi.com/
