Pak orë para nisjes së debatit për Demarkacionin është shkaktuar një incident në kuvendin e Kosovës.
Sigurimi i kuvendit nuk ka lejuar pjesëmarrjen në debatin për demarkacion përfaqësuesit e komunës së Pejës, Deçanit dhe Rugovës, me arsyetimin se nuk janë të ftuar.
Përfaqësuesi i këtyre komunave, Sali Lokaj, ka thënë se këta përfaqësues kanë qenë pjesëmarrës në të gjitha komisionet për demarkimin e kufirit, përfshirë edhe atë ndërkombëtar.
Lokaj ka deklaruar se ftuarit në atë sallë nuk dinë asgjë për kufijtë me Malin e Zi.
“Një pjesë e madhe e tyre të ftuarve nuk dinë asgjë për kufi, por vetëm t’ia bëjnë qefin qeverisë. Qëllimi i tyre është që t’ia japin atë pjesë Malit të Zi”, ka thënë Lokaj për mediat kosovare.
Ai ka përsëritur qëndrimin se kufiri mes Kosovës dhe Malit të Zi duhet të jetë në Qakorr, ndërsa sipas tij, qeveria po insiston në marrëveshjen e vitit 1988, e cila nuk është ratifikuar asnjëherë.
“Harta e vitit 1974 tregon se kufijtë kanë qenë në Qakorr. Janë diku 8 mijë hektarë që humbim. Këta [qeveria] po flasin për hartat e vitit 1988. Ajo marrëveshje nuk është ratifikuar në atë kohë. Ne do të hyjmë në debat. Do të dalim vetëm në mënyrë të dhunshme”, ka thënë Lokaj.
Vetëvendosje lëshon sallën kur e merr fjalën Thaçi
Opozita kosovare, ka lëshuar sallën alternative të kuvendit kur presidenti i vendit Hashim Thaçi doli për të marrë fjalën e rastit në lidhje me demarkacionin me Malin e Zi.
Ndryshe, debati për Demarkacionin ka filluar në ora të10:30 dhe pritet të zgjatë deri në ora 15:00 ku do të shtrohen faktet për marrëveshjen në fjalë.
