Eshtë nisur drejt Turqisë efektivi policor Fadil Allaraj, të cilit iu dëmtua syri gjatë protesstave të fundit të shpërthyera në vend, karakterizuar nga dhuna ndaj institucioneve, pronës publike dhe uniformave blu, nën kredon me sfond politik “Drejtësi për Klodianin”.
“Efektivi i plagosur i Policisë së Shtetit, Fadil Allaraj, fluturoi për në Turqi ku do të kryejë një ndërhyrje të specializuar në sy, me shpresën që pas shpëtimit të masës së shqyer të syrit në ndërhyrjen e parë, të mund t’i kthehet edhe një pjesë e shikimit”, shkroi kryeminsitri Rama në Facebook.
Kjo u njoftua prej tij pak ditë më parë, pasi vizitoi Allarajin në spital.
Ky rast është i dyti pas atij të Ina Ukës pak kohë më parë, gjatë protestave te parlamenti, së cilës iu këpur gishti nga lëndët plasëse të hedhura nga protestuesit. Uka gjithashtu u çua për trajtim special në Turqi.
Në gjykimin e shefit të qeverisë, policia ka qenë e përmbajtura e madhe e shumë protestave të dhunshme vitet e fundit, duke qenë njëherësh dhe e dëmtuara e madhe prej tyre.
Nga ana tjetër, zërat opozitarë akuzojnë policinë se është e treguar e ashpër me ta sidomos në lëshimin e gazit lotsjellës. Apo, me rastin e fundit të jetëhumbjes së Klodian Rashës, ka treguar, sipas gjykimit opozitar, se ajo është kërcënuese jetësh në Shqipëri. /tesheshi.com/
