Ilir Meta nuk e ka lënë pas sloganin e fushatës së zgjedhjeve vendore. Me qetësi dhe dashuri, ai ka mohuar “ftohjen” e përfolur në media mes tij dhe kryeministrit të vendit, Edi Rama duke kompletuar kështu rrethin e deklaratave të verës.
“Raporti PS-LSI është mjaft pozitiv, konstruktiv dhe bashkëpunues dhe sidomos raporti mes socialistëve në përgjithësi”, ka qenë komenti i Metës në intervistën e dhënë për NEWS24. Kështu, duket se zërat që nisën nga Tiranë për prishje të koalicionit në vjeshtë, e u komentuan nga Dhërmiu prej kryeministrit Rama, përfundojnë rrethin me deklaratat e Metës.
Gjithsesi, një “ftohje” duket edhe në qëndrimet e kryeparlamentarit por kryesisht sa i takon problemeve të ekonomisë.
Këmbënguljes së gazetares në mënyrë që publiku të jetë i qartë nëse LSI e mbështet pa rezerva Qeverinë, Ilir Meta i është përgjigjur se LSI i ka dhënë mbështetjen maksimale kësaj qeverie. Kjo pyetje, sipas tij, nuk ka kuptim, ndërsa shprehet se LSI është kundër parcelizimit të qeverisë.
Takimi Rama-Nano? Përgjigja e Ilir Metës: Nuk kam dijeni, por sa herë takohen dy njerëz nuk mund të ndjej vec gëzim. /tesheshi.com/
