Politika kosovare është diskredituar dhe krijimin e një subjekti të ri politik, qytetarët e shohin si shpresë. Kështu ka thënë në një bashkëbisedim me studentët e Kolegjit “Pjetër Budi” deputeti i pavarur kosovar Ilir Deda.
Ish-vetëvendosësi që është një ndër iniciatorët e themelimit të një iniciative të re politike, është shprehur se nuk dëshiron të kontribuojë më në projektet politike të të tjerëve, andaj edhe synon të themelojë subjektin e ri bashkë me një numër të madh qytetarësh, të cilët do të jenë që nga fillimi hisedarë të projektit.
“Në subjektin e ri duhet dhe do të bashkohen jo vetëm qytetarë të pakënaqur, por edhe njerëz të brezit të ri, që janë të shpërndarë nëpër parti të ndryshme politike“, citohet të ketë thënë Deda, i cili ka shtuar se ka ardhur koha të marrë fund klientelizimi.
Sipas tij, subjekti i ri politik, i cili pritet të themelohet në fund të qershorit, do të ketë në fokus programin për individin. /tesheshi.com/
