Ditën që presidenti Meta ndodhej në Berat për pjesëmarrjen në ceremoninë e “gjetjes së kryqit në ujin e bekuar”, një rit ortodoks që zhvillohet në disa qytete shqiptare me det, lumenj apo liqene, ku pra ka komunitete ortodokse, një ndër njerëzit me të afërt të tij në LSI, ish-ministri Nasip Naço, vendos të kalojë te PS.
Kujtojmë: Nasip Naço ishte në krye të drejtësisë kur nis Reforma e famshme dhe e zhurrmshme në Drejtësi, por pa patur fërkime në asnjë rast me kryeministrin Rama.
Në prezencë të Blendi Klosit, teksa pak më tutje, në Osum, ndodhej Meta, Naço do deklaronte:
“Sot është një ditë e bekuar, por edhe e bekuar se janë në krah të mikut tim zoti Klosi.
Sot do të shprehja edhe një herë qëndrimin tim se do të jem në krahë të majtës progresiste, ku Berati dhe Shqipëria nuk ka nevojë më për eksperimente politike, kanë nevojë për të ecur përpara.
Unë kam qenë pjesë e kabinetit qeveritar nga LSI së bashku me PS. Kontributi im ka qenë modest por përkushtimi im ka qenë i madh për të ecur para si me Reformën në Drejtësi dhe në reformat e tjera që janë të domosdoshme. Ajo që mund t’ju them është se sot jam më zotin Klosi dhe në të ardhmen do të jem me të”, tha Naço.
Ndërsa Meta, me vështrimin nga ujrat e Osumit ku do gjendej kryqi dhe me jë prift në krah, do deklaronte:
“Le të na ndriçojë kjo ditë e bekuar dhe ky moment për të na forcuar besimin në Zot, për të përballuar sfidat e vështira dhe për të na mbrojtur nga kjo pandemi.
Le të na ndihmojnë këto bekime të sotme për të qenë më të bashkuar dhe për të përballuar sfidat e këtij viti”. /tesheshi.com/
