Kreu demokrat Basha, i cili e shpalli Teatrin si “vijë të kuqe”, por që s’mundi ta ndalë fizikisht shembjen, mjaftua vetëm me komente të natyrës politike.
“Kjo që ndodhi sot shpjegohet me tre fjalë. Dhunë, babëzi dhe hajdutëri është kjo që ndodhi sot. Përgjegjësi i vetëm për këtë situatë, për prishjen e teatrit, për dhunimin e mediave dhe dhunimin e protestuesve është Edi Rama.
Në fillim policia ka ushtruar dhunë ndaj gazetarëve pastaj ka ushtruar dhunë ndaj protestuesve. Aktivistët e Aleancës për Mbrojtjen e Teatrit janë dhunuar dhe arrestuar nga policia”, tha Basha.
Ndërsa kryetarja e LSI-së, Monika Kryemadhi, bëri thirrje për mosnjohje shtetit, sipas saj, atij të Edi Ramës.
“U bëj thirrje të gjithë qytetarëve që të mos e njohin më shtetin e Edi Ramës. Edi Rama e tregoi që është një anti-shqiptar.
Veliaj dhe Rama sot kanë shkatërruar historinë. Unë lutem për shpirtin e Edi Ramës pasi aty ku Rama mendon se do të hidhen themelet e kullave, aty do të jetë varri i Edi Ramës”, tha Kryemadhi.
Kujtojmë se të dy këto emra, kryesorët në politikën e opozitës, vendosën të kalojnë dhe natën në oborrin e TK-së, por që s’e ndalën dot prishjen e planifikuar. /tesheshi.com/
