Ka rrjedhur një informacion i rëndësishëm nga ana e personave që po merren me rekrutimin e njerëzive të Byrosë Kombëtare të Hetimit.
Një nga kandidatët më potencialë për ta drejtuar këtë institucion të rëndësishëm është pikërisht Ahmet Prençi, ish-Drejtori i Përgjithshëm i Policisë së Shtetit në kohën e Berishës, i cili është “ruajtur” nga Edi Rama pikërisht për këtë institucion që Rilindja e ka pasur në program që në zgjedhjet e 2013-ës.
Ditën e sotme, disa media pranë opozitës, e kanë lançuar dhe më pas e kanë fshirë si lajm, pikërisht sepse misioni ishte që të kërcasin dhe të djegin letrat.
Por një burim pranë mazhorancës ka bërë të ditur se bëhet fjalë për një kandidaturë me integritet dhe se ka shumë gjasa që të jetë një oficer me përvojë si zoti Prençi.
Burime të rëndësishme bënë të ditur se përveç Premçit, një nga kandidatët për të drejtuar Byronë e Hetimit është edhe gjenerali tjetër i policisë, Bajram Ibraj, i cili i shkarkua pasi nga media të djathta u etiketua si “musliman”.
Oficeri i karrierës, Bajram Ibraj është një nga eprorët më të papërfolur të Policisë së Shtetit dhe për vite ka qenë shef sigurie i një institucioni financiar të lidhur me amerikanët.
Sipas ligjit për Byronë Kombëtare të Hetimit, drejtori i këtij institucioni do të duhet të jetë një oficer i lartë karriere në Policinë e Shtetit dhe i papërfolur për lidhje politike dhe afera.
Në fakt, edhe Prençi edhe Ibraj janë njohur si oficerë me integritet dhe me lidhje të forta me partnerët, veçanërisht SHBA-në.
Një kabllogram i ambasadës amerikane i botuar nga Wikileaks bënte të ditur se ambasadori i asaj kohe, John Withers, akuzonte ish-zv.drejtorin e Përgjithshëm të Policisë, Agron Kuliçaj se ka izoluar dhe ka kontradikta me drejtorin Ahmet Prençi, të cilin më pas e shkarkoi.
Withers theksonte se Kuliçaj ka lidhje me Dritan Dajtin dhe dekonspiron aksionet për kapjen e tij.
Edhe operacioni që u krye në Durrës në vitin 2009 ku Dajti vrau 4 oficerë policie, u bë gjatë kohës që Kuliçaj ishte në SHBA.
Ndërkaq, mësohet se kandidate për të drejtuar Prokurorinë Speciale SPAK, është prokurorja Elisabeta Ymeraj, e specializuar disa herë në Shtetet e Bashkuara të Amerikës për luftën kundër krimit të organizuar dhe terrorizmit.
Prokurorja Ymeraj, prej 12 vitesh punon në organin e akuzës për Krime të Rënda.
Një tjetër kandidat përveç Ymerajt është edhe Dritan Reshka, ish-kreu i Task-forcës kundër korrupsionit, që nuk u dekretua nga Nishani dhe më pas u shkarkua nga Llalla.
Brenda këtij muaji pritet edhe kalimi i paketës prej 7 ligjesh të cilat do të mundësojnë ngritjen dhe funksionimin e këtyre dy institucioneve që janë marrë në kujdestari direkte nga SHBA.
Në mbledhjen e datës 13 korrik, Komisioni i Posaçëm për Reformën në Drejtësi miratoi ligjin “Për organizimin dhe funksionimin e institucioneve për të luftuar korrupsionin dhe krimin e organizuar” SPAK. Mirëpo, gjatë diskutimeve të këtij dolën detaje interesante mbi rolin e organeve, asistencën e FBI dhe shembujt që do ndiqen.
Roli i FBI
Kreu i OBDAT-it, Jon Smibert ka treguar se FBI do asistojë shumë te Byroja e Hetimit dhe jo te Prokuroria Speciale.
Sipas tij, agjentët do trajnohen nga ata dhe do ketë ndihmë financiare.
“Mendoj se termi ‘hetues’ përdoret për të bërë dallimin ndërmjet atyre personave që punojnë drejtpërdrejt me BKH, të cilët do të marrin trajnimin e veçantë për këtë gjë dhe çdo gjë tjetër. Këta persona dallohen nga ata që janë në shërbim, të cilët do të jenë oficerët e Policisë Gjyqësore”, ka thënë ai.
Më tej, Smibert ka deklaruar se “një agjent i FBI do qëndrojë gjatë gjithë kohës te BKH, ndërsa ka shtuar se ndihma do jetë financiare dhe teknike. Sipas tij, në Byronë e Hetimit do jetë një këshill i veçantë, i cili do ketë vetëm ekspertë të huaj që do japin asistencën e tyre. “Kjo është pjesë e pritshmërisë, që SHBA dhe BE ka pasur për formimin e BKH, sidomos për sa i përket financimit të SHBA, ky komision do të ndihmojë. E di se një prej personave do të jetë nga FBI, atashe ligjor dhe përfaqësues i ICITAP”. /tesheshi.com/
