Zllatan Ibrahimovic e di mirë se të mos luash për njëfarë kohe futboll, harrohesh e zëvendësohesh në zemrat e tifozëve.
35-vjecari që u dëmtua rëndë në fund të sezonit të kaluar, ndërsa luante për Manchester Junajted, duket se është në fazën e rikuperimit të plotë të tij, pasi ka postuar në rrjetet sociale disa foto të stërvitjes në palestër.
Nën këto foto, ka lëshuar edhe “dorezën” drejt trajnerit Hoze Murinjo. “I thoni Murinjos se jam duke ardhur”- ka qenën nënshkrimi i suedezit, i cili në fakt, me rikthimin e tij tek “Djajtë e kuq”, do të vërë realisht në vështirësi trajnerin, pasi me karakterin që ka, por edhe superklasin që ende e zotëron, do të kërkojë vend në formacion.
Nga ana tjetër, Murinjo, po shijon çdo javë këmbënguljen për blerjen e Lukakut, i cili shënon me rregulltësi dhe është kthyer në pikën e referimit për Manchesterin.
Mes belgut dhe suedezit, ka hyrë me prepotencë edhe talenti britanik Rashford, që nuk do t’ia dijë kujt do t’ia zërë vendin, përsa kohë, luan shkëlqyeshëm dhe është kthyer protagonsit edhe i kombëtares angleze.
Pra me kthimin e Ibrahimoviç, rikthehet edhe “dhimbja e kokës” për Murinjon…E ai “vdes” të ketë të tilla “dhimbje”, sepse e do presionin, por edhe ia di ilaçin situatave. /tesheshi.com/
