Kryeministri Rama i ka kushtuar një status idesë së tij të beftë të krjimit të një shteti Sovran bektashi, nën një këmbëngulje të çuditshme, si të ishte vetë një i tillë, deri duke i mitizuar bektashinjtë, pra me atribute më shumë se ç’kanë patur apo kanë.
Çudinë e tij në formë trillil pa asnjë fill arsyetimi bindës, krejt papandehur, pa qenë bektashizmi kurrë ndonjë çështje për debat, ai ia atribuon kritikëve.
“Jam mësuar të lexoj e dëgjoj çudira pas çdo ideje të re apo projekti ndryshimi që kam shprehur apo paraqitur në tërë këto vite, po këtë herë çuditë e thëna a të shkruara fill pas shprehjes së idesë të krijimit të një entiteti sovran të Urdhrit Bektashi, brenda perimetrit të pronës së Kryegjyshatës Botërore në Tiranë, kanë kaluar kufijtë e të gjitha fantazive dhe ligësive të pritshme.
E vetmja gjë që nuk kam dëgjuar të thuhet nga kundërshtarët e zjarrtë të kësaj ideje është qoftë edhe një fjali me kuptim, mbi historinë dhe rolin e bektashinjve në fatet e kombit e të shtetit tonë, se mirë për sfidat e mbijetesës së Urdhrit Bektashi sot e gjithë ditën duket që as nuk do t’ia dijë askush nga ata që çfarë s’po nxjerrin prej goje!”, nis një reagim të tij të orëve të fundit kreu i qeverisë.
Më tej, Rama pretendon se kritikët e idesë së tij janë të padijshëm ndaj rolit të bektashinjve për kombin, a thua se është një çështje që kërkon me patjetër dije të thellë. Njëherësh, ai e konsideron shtetin bektashi, por nuk shpjegon se si, investim në tolerancë fetare(!).
“Padija e skëterrshme dhe shkujdesja brutale në trajtimin e një çështjeje me kaq vlerë, ma përforcojnë bindjen se kësaj ideje i ka ardhur koha të vihet në jetë dhe se nevoja e këtij hapi është jo vetëm në harmoni të plotë me interesin tonë kombëtar, po edhe në shërbim të domosdoshmërisë së investimit tonë të vazhdueshëm për ruajtjen e për pasurimin e thesarit të paçmueshëm të tolerancës e të harmonisë fetare, ku bektashizmi ka meritën dhe rolin e vet të pazëvendësueshëm krahas tre besimeve të tjera.
Gjithsesi, nga ideja tek jetësimi i saj ka një kohë të tërë për t’u kthjelluar çdo gjë dhe një proces të tërë publik e legjislativ për t’u zhvilluar, kështu që nuk ka asnjë ngut e asnjë nevojë për polemika të kota”.
Duke vijuar t’i mitizojë më tepër se ç’kanë qenë apo janë bektashinjtë, Rama madje vë alarmin se ata mund të tkurren dhe se për këtë arsye duhen shpëtuar(!).
“Në ndërkohë ftesa ime për kundërshtarët e kaqshumëngutur të idesë është që të njihen me faktet dhe kontributet historike të Urdhrit Bektashi në punët e kombit e të fesë në Shqipëri, duke shpresuar se mbase kjo njohje do t’i ndihmojë për të parë të paktën diçka sa të thjeshtë aq edhe kuptimplotë.
Ndryshe nga komunitetet e tjera, të cilat kanë avantazhin e natyrshëm të përkatësisë në komunitete shumë të mëdha me shtrirje globale – pra kanë edhe mundësi të mëdha mbështetjeje të pandërprerë në rrugën e tyre – komuniteti bektashi është si të thuash ‘jetim’ në këtë këndvështrim. Prandaj afërmendsh që ngritja e statusit të Kryegjyshatës Botërore në Shqipëri në nivelin e një entiteti sovran, jo vetëm do të ulte ndjeshëm kërcënimin real të tkurrjes së atij komuniteti deri në tretje në harkun e disa dekadave, po do të garantonte një vazhdimësi të qëndrueshme të ekzistencës së tij për breza të tërë”, përfundon reagimin e tij, brutal dhe të skëterrshëm në palogjikë, njeriu që qeverisë Shqipërinë. /tesheshi.com/
