Edhe pse u injorua menjëherë nga Rithemelimi, madje nga vetë Berisha duke e mos e njohur as si kryetar grupi e aq më pas si kryetar PD-je i komanduar, Alibeaj doli gjithsesi para medias për të prezantuar platformën e tij të bashkimit. Argumenti: mbështetja e pretenduar nga shumica e deputetëve demokratë, më saktë nga 31 të tillë.
Ai ka lexuar disa nga emrat e tyre, si Agron Gjekmarkaj, Alfred Rushaj, Arbër Agalliu, Andia Ulliri, Dhurata Çupi, Emilia Koliqi, Gazmend Bardhi, Flutura Açka, Jorida Tabaku, Kreshnik Çollaku, Lefter Gështenja, Lulzim Basha, Oriola Pampuri, etj..
Sa për Berishën, ai tha se nuk ka ndryshuar qëndrim: ai s’është pjesë e grupit.
“Kjo platformë iu drejtohet bazës së demokratëve. Është qëndrim detyrim politik dhe moral i kujtdo në përfaqësim të tyre që tua bëjë atë shërbim atyre. Bashkimi është një vlerë që të gjithë demokratët e duan. Një votë e ndershme ku përfshihen të gjithë demokratët ku nuk përjashtohet askush, besoj se nuk ka asnjë të sharë në aspektin moral. Nëse demokratët në bazë bashkohen gjithçka tjetër del e tepërt”, arsyetoi ai.
Pikat e platformës
1- Grupi Parlamentar i PD apelon me forcë për shmangien e gjuhës së urrejtjes, shantazhit, përçarjes.
2- Deputetët e përjashtuar apo pezulluar në 12 janar 2022, rikthehen në grup.
3- Anulohet çdo proces i njëanshëm riorganizimi apo mbledhje të strukturave qendrore të partisë.
4- Grupi Parlamentar ngre një grup pune të përbashkët për realizimin e bashkimit të partisë.
5- Grupi i Përbashkët përcakton strukturat zbatuese të planit të bashkimit.
Hapi i parë: Certifikimi i anëtarësisë aktuale.
Hapi 2: Fillimi i procesit të zgjedhjeve në nivel seksioni, grupseksioni dhe dege.
Hapi 3: Procesi i zgjedhjes së kryetarit të Partisë. /tesheshi.com/
