“Lironi Nehat Kulla”, shkruhej dikur në murrin e pasëm të një kioske në afërsi të ish-PD. Mbishkrimi mural që binte në sy për pasaktësinë gjuhësore, tipike prej anaflabetësh të sinqertë e njëherësh adhurues të fortësh, është bërë realitet pas 20 vitesh që kur u shfaq, pasi ai, “gjenerali” i ’97-ës në kryeqytet, Nehat Kulla, la qelinë pas vuajtjes së dënimit me 20 vite heqje lirie.
I forti i periferive kryeqytetase, i cili njihej me nofkën ushtarake, mu prej uniformës që mbante, e gjithashtu prej automjetit, ka shlyer të gjithë dënimin për vrasjen e Halim Gjuzit, ish-shoferi të ish-ministrit të Brendshëm, Halit Shamata, ngjarje e ndodhur në vitin 1998 në Golem.
Por si lindi miti i Nehat Kullës dhe bandës së tij famëkeqe? Ajo u krijua gjatë trazirave të vitit 1997 në Shqipëri. Kulla, siç raporton TCH, së bashku me familjarë e miq të tij mbajtën të paprekur repartin e xheniose, ndër të vetmit të padëmtuar gjatë sulmeve. Ai, së bashku me të ashtuquajturit ushtarë të tij, e mban repartin nën kontroll për disa kohë, duke i vënë vetës edhe nofkën gjenerali, emër të cilin ia pagëzuan të gjithë banorët e zonës për të cilët ai ishte njeriu më me influencë.
Madje, gjatë vitit 1997, kur shteti kishte humbur kuptimin e vet, ai arrin të krijojë një komisariat të mirëfilltë policie, me aktivitet në zonën e Kinostudios dhe Tufinës në Tiranë.
Banda e tij akuzohet se ka kryer shumë vrasje dhe krime të tjera të frikshme në vitet 1997-1998.
Nehat Kulla do të vetëquhej ‘gjenerali’ pasi kishte grabitur një kamionçinë ushtarake tip Shevrolet me targa ushtrie dhe sinjale policie, duke mbajtur veshur uniformë ushtarake. Ai shoqërohej gjithmonë nga një eskortë e armatosur me automatikë dhe vetë gjithashtu kurrë nuk e lëshonte armën nga dora.
Pritet të shihet se cili do jetë stili i jetës së tij pas burgut. Thënë ndryshe, a do ketë vënë mend…/tesheshi.com/
