Këshilli i Lartë i Drejtësisë ka votuar sot për kreun e ri të Gjykatës së Apelit të Tiranës. Ai është Hysni Demiraj, i cili ka fituar këtë post me 8 vota pro dhe dy kundër. Demiraj deri më sot ka mbajtur postin e gjyqtarit në këtë gjykatë
Mësohet se në këtë votim nuk ka qenë i pranishëm kreu i Këshillit të Lartë të Drejtësisë, Xhezair Zaganjori.
Ndërkohë, nuk dihet ende nëse ministri i Drejtësisë, Ylli Manjani ka votuar pro apo kundër kandidaturës së z. Demiraj. Në garë ka qenë edhe Alaudin Malaj, i cili ka qenë në krye të kësaj gjykate për 4 vite me radhë.
Më herët gjatë ditës së sotme ka pasur debate sa i përket kandidimit të Malajt. Në një letër zyrtare ai i ka kërkuar ministrit Ylli Manjani që anëtari i KLD-së, Gjin Gjoni të mos jetë i pranishëm në këtë votim, për shkak të përplasjeve që Malaj ka pasur me të në të shkuarën.
Pa u marrë ende një vendim nga ana e ministrit të Drejtësisë, vetë Gjoni ka dhënë dorëheqjen nga votimi, pa bërë të ditura shkaqet. /tesheshi.com/
