Në Hungari kanë hyrë në fuqi ligjet e reja të ashpra që ndalojnë hyrjen e emigrantëve të paligjshëm. Policia tashmë mund të ndalojë secilin që përpiqet të hyjë duke shkelur gardhin me tela me gjemba të ndërtuar nga autoritetet përgjatë kufirit me Serbinë.
Hungaria është bërë pikë hyrëse për rrugëtimin e refugjatëve drejt veriut të Europës, e me mijëra emigrantë nga Lindja e Mesme dhe Afrika ndodhen në këtë vend.
Bashkimi Europian, nga ana e vet, arriti të miratojë rishpërndarjen për 40 mijë refugjatë që do të merren nga Greqia dhe Italia për t’i sjellë në vende të tjera të BE-së, por nuk arriti të caktojë kuota të detyrueshme për shpërndarjen e 120 mijë azilkërkuesve të tjerë.
E ndërsa BE i ka shtyrë bisedimet për një samit në tetor, policia hungareze ka mbyllur një pikëkalimi hekurudhor që është përdorur nga dhjetëra mijë refugjatë për të kaluar në anën tjetër. Shumë prej këtyre njerëzve e kaluan natën jashtë në anën serbe të kufirit.
Autobuzë të policisë tashmë do të transportojnë aplikantët për azil në qendrat e regjistrimit, por nëse kërkesat e tyre refuzohen ata do të kthehen në Serbi nga kanë ardhur në vend që t’u miratohet kalimi përmes Hungarisë për në Austri e Gjermani.
Një numër rekord prej 9 mijë personash mbërritën në Hungari përpara mbylljes së kufirit. /tesheshi.com/
