Dy anije peshkimi janë zhdukur pa gjurmë në Durrës. Kontaktet e fundit të dy peshkarexhave me emrat “Qamili” dhe “Çelepia” kanë qenë pasditen e së martës, kur kanë kontaktuar për të herë të fundit me kapitenerinë e portit të Durrës.
Paraprakisht dyshohet se në anijet e zhdukura ndodhen rreth tetë persona, fati i të cilëve nuk dihet ende. Kanë qenë familjarët e personave që ndodheshin në peshkarexha ata që kanë bërë denoncimin për zhdukjen e tyre, duke insistuar që të nisin kërkimet.
Policia ka bërë me dije se gjatë paradites së sotme është lokalizuar njëra nga dy anijet e peshkimit të denoncuara si të zhdukura nga Durrësi.
Në grykëderdhjen e Bunës është gjetur peshkarexha “Qamili”, e cila kishte humbur kontaktet prej 24 orësh. Mendohet se personat që ndodheshin në bord, po peshkojnë.
Ndërkohë për peshkarexhën “Çelepia” dyshohet se ndodhet në ujërat ndërkombëtare, në ato egjiptiane. Të dhënat e para hedhin dyshimet se një marinar egjiptian i cili ndodhej në bord, mund të ketë drejtuar anijen drejt Egjiptit. Anija “Çelepia” ka humbur kontaktet prej pesë ditësh. /tesheshi.com/
