Kryeministri i Kosovës Avdullah Hoti tha të shtunën se njohja e ndërsjelltë është tema e vetme në çdo takim që ai ka pasur dhe do të ketë me përfaqësuesit e Serbisë.
Në një postim në profilin e tij në Facebook, ai theksoi se vetëm njohja e ndërsjelltë normalizon marrëdhëniet ndërmjet Kosovës dhe Serbisë dhe se kjo do të qetësojë Ballkanin dhe Evropën.
“Në çdo takim që kam pasur dhe do të kem me përfaqësuesit e Serbisë, njohja reciproke është tema e vetme. Gjithçka që diskutohet me ta është në funksion të arritjes së një marrëveshjeje për njohje reciproke, pa rrezikuar integritetin territorial ose karakterin unitar të Kosovës”, tha Hoti.
Sipas tij, Kosova mbetet e përkushtuar për dialog, sepse është “një vend evropian, me një orientim të qartë euro-atlantik”.
“Duke pasur parasysh këtë qartësi të plotë të procesit, unë nuk do të hezitoj të përfshihem në dialog,” tha Hoti, duke përsëritur ftesën e tij partive politike në Kosovë për t’u bashkuar me procesin.
Ai tha se konkurrenca politike në Kosovë duhet të jetë demokratike dhe e bazuar në Kushtetutën e Kosovës, dhe se “ajo mund dhe duhet të zhvillohet për tema të tjera të politikës, ekonomisë, arsimit, shëndetësisë dhe fushave të tjera”.
Kujtojmë se përfaqësuesit e Kosovës dhe Serbisë do të takohen në 4 shtator në Shtëpinë e Bardhë në Uashington. /tesheshi.com/
