Nga Blendi Gashi
Edhe pse përçarja në Vetëvendosje ka muaj që ka ndodhur, kryetari i Prishtinës, Shpend Ahmeti, refuzon të përgjigjet se cilit krahë i takon, atij të Albin Kurtit apo të Daradan Molliqajt e Visar Ymerit.
Ai së bashku me deputetin Glauk Kojufca ishin caktuar si ndërmjetës për të tejkaluar krizën por nuk arritën suksese. Dhe Ahmeti përveç që shprehet i befasuar me ndodhitë në partinë që udhëhoqi Visar Ymeri, djalë i tezës së tij, nuk ka pranuar të tregoi nëse do largohet nga Vetëvendosje në momentin kur kjo parti zyrtarisht do ndahet në dysh.
“Se a do të qëndroj në VV… unë po pres se nuk e kam të qartë se çka po ndodhë në VV. Arsyeja pse kam hyrë në VV ka qenë bashkimi për ta mundur të keqen, pra nga të gjitha forcat. Nuk e di se çka do të ndodhë. Unë nuk mund të ndërroj mendim dhe qëndrim për asnjërin prej shokëve të mi që kam pas dhe kam në VV. Unë nuk kam njohur njerëz më të afërt në politikë se sa Albinin, Visarin dhe Dardanin. Kur dolën këto në publik isha kritik për krejt këto që dolën, unë nuk isha i përfshirë me asnjërën palë prandaj unë i kam qëndrimet dhe besimet e mia politike që do t’i shtyj pa marrë parasysh ku jam ku do të jem”, tha Ahmeti më 5 shkurt në emisionin “Pulsi” të KTV-së.
Pse po hesht Ahmeti?
Heshtja e tij ka bërë që jo pak medikat kosovare ta radhitin pranë njërit apo tjetrit krahë. Ai deri më tani ka folur me respekt për dy palët por pa thënë se kah do e vazhdojë rrugëtimin në politikë.
Mos shkuarja e Albinit në zyrë tek Shpendi për ta uruar për mandatin e dytë si kryetar i Prishtinës dhe takimi u tyre i vetëm në publik ditën kur u mbajt mbledhja e Këshillit të Përgjithshëm të Vetëvendosjes për të disktuar për përçarjet në parti, ku të dy në seli erdhën me një veturë të tipit “Passat”, lanë të kuptohet se Ahmeti mund të përfundoi në krahun tjetër.
Kjo bindje u përforcua dhe më tepër pasi që Kurti shkoi në zyrë për ta uruar Mytaher Haskukën pasi u zgjodh kryetar i Prizrenit.
Ndërsa për ta bërë sa më reale se Ahmeti po rrëshqet drejt krahut të dorëhequrve u përkujdes Dardan Molliqaj, “armiku” më i madh i Kurtit.
Pasi Komisioni parlamentar për Zhvillim Ekonomik e procedoi në Kryesi propozimin që Pallati i Rinisë të kthehet në ndërmarrje publike komunale, Molliqaj e uroi Ahmetin përmes një postimi në Facebook.
“Në mbledhjen e sotme, Komisioni për Zhvillim Ekonomik, Infrastrukturë, Tregti, Industri dhe Zhvillim Rajonal, vendosi që Kuvendit t’ia procedojë për vendim propozimin e përbashkët të Kryetarit të Komunës së Prishtinës dhe Qeverisë së Kosovës, që Ndërrmarrja ‘Qendra shoqërore, sportive, kulturore dhe ekonomike Pallati i Rinisë’ në Prishtinë, të kthehet në ndërrmarrje publike komunale. I bëj thirrje Kryesisë së Kuvendit që sa më shpejtë të mbajë mbledhje, ta fusë në rend të ditës për seancë plenare dhe pastaj deputetët të kenë mundësi që këtë ndërrmarrje t’ia kthejnë nën menaxhim qytetarëve të Komunës së Prishtinës. Komuna e Prishtinës e ka për detyrë të menaxhoj këtë ndërrmarrje dhe t’i nisë investimet e duhura për ta bërë atë një qendër sic i ka hije Kryeqytetit. Urime Kryetar z. Ahmeti! Urime të gjithë qytetarëve të Prishtinës!”, shkruajti Molliqaj në Facebook duke u bërë i “gjallë” pasnjë heshtjeje të gjatë.
Pra ky mesazh i Molliqajt përtej urimit u lexua dhe një porosi për Kurtin se Ahmeti nuk do rreshtohet krahë tij dhe se Komuna e Prishtinës përfundimisht sikur ajo e Kamenicës do jetë në duar të një partie të re që do themelohet së shpejti nga të pakënaqurit.
Megjithatë për të vazhduar engimën se me kënd do bashkohet, Ahmeti u përkujdes vet pasi të shtunën me Kurti bëri homazhe te pllaka përkujtimore ku kanë rënë aktivistët Arben Xheladini dhe Mon Balaj në sheshin “Nëna Terezë” në Prishtinë, në të cilat homazhe mungoi grupi i të dorëhequrve.
Nuk dihet nëse përmes këtij përkujtimi Ahmeti përfundimisht u rreshtua krahë Kurtit duke “tradhëtuar” përfundimisht grupin tjetër. Por këtë muaj Ahmeti përfundimisht do të përcaktohet për të ardhmen politike pasi vet të dorëhequrit kanë paralajmëruar se do vendosin për të ardhmen e tyre politike. /tesheshi.com/
