“Kam vendosur që nuk do të jem kandidat,” lajmëroi ditën e djeshme Francois Hollande në një paraqitje televizive nga Pallati Elize.
Presidenti francez ka pranuar se nuk ishte në gjendje t’i bashkonte rreth kandidaturës së tij socialistët e ndarë thellë.
“Detyra ime e vetme në muajt që vijnë do të jetë të vazhdoj të udhëheq vendin tim,” ka bërë të qartë ai.
Siç nënvizon France 24, tërheqja do të thotë se Holande bëhet i pari president i republikës së pestë franceze, që mori jetë në 1958-n, që nuk pranon të rikandidatojë e largohet pas një mandati.
Një president jopopullor, një sondazh i ri i dy ditëve më parë parashikonte që Holande do të fitonte vetëm shtatë për qind të votave në raundin e parë të zgjedhjeve të ardhshme presidenciale në Francë.
Socialistët francezë nisën dje të presin emrat e kandidatëve për zgjedhjet paraprake brenda partisë më 22 dhe 29 janar të vitit 2017.
Arnaud Montebourg dhe Benoit Hamon, dy ish-ministra, janë tashmë mes pretenduesve, ndërkohë që pritet që në garë të marrë pjesë dhe kryeministri Manuel Valls. /tesheshi.com/
