Holanda ka marrë prej 1 janarit Presidencën e Bashkimit Europian, kryesim që do të zgjasë deri në muajin korrik.
Presidenca holandeze në fakt nuk është një lajm shumë pozitiv për Shqipërinë dhe Kosovën, pasi Haga ka qenë një nga skeptiket më të mëdha për dhënien e statusit kandidat Shqipërisë dhe për liberalizimit të vizave Kosovës.
Ministri i jashtëm i Shqipërisë, Ditmir Bushati, ka lëshuar një mesazh “joshës” ndaj qeverisë holandeze për të arritur tek një vendim pozitiv për hapjen e negociatave brenda këtij gjashtë mujori.
“Mirënjohës Luksemburgut për presidencën e saj gjithëpërfshirëse dhe u urojmë fat miqve tanë holandezë që ata të marrin hapat e duhura”, shkruan Bushati në në një postim në twitter.
Shqipëria pret që të hapë negociatat, pasi Brukseli e bëri një hap të tillë për Malin e Zi dhe Serbinë në 2015-n.
Koha e pritshme është pas miratimit të reformës në drejtësi, e cila është premtuar të kalojë në pranverë.
Ndërkaq, në Hagë do të ketë selinë edhe e famshmja Gjykatë Speciale e Kosovës ku do të hetohen disa prej krimeve të ndodhura gjatë luftës së viteve 1998-99.
/tesheshi.com/
