Vetëvendosje fiton zgjedhjet e parakohshme në Kosovë, e kreu i saj, themeluesi e më pas drejtuesi, i dorëhequri dhe i rikthyeri Albin Kurti, do jetë kryeministri i ri i vendit, duke pasuar në detyrë Ramush Haradinajn, dorëheqja e së cilit çoi në këto zgjedhje. Ky i fundit nga ana tjetër, është humbësi katastrofik i këtyre zgjedhjeve.
Kurti e quajti fitoren e tij si “çlirimin e tretë” të Kosovës, në të parën fjalë publike, teksa numërimi i votave ishte në fund, e gjithçka po e konfirmonte atë si triumfator.
“6 tetori i vitit 2019 e shënon fillimin e entuzsiasmit të tretë. I pari ishte çlirimi i Kosovës në qershorin e 99’ës, i dyti ishte shpallja e pavarësisë, ndërsa i treti është tetori dhe fitorja e Vetëvendosjes. Tash e hapim një kapitull të ri me faqe të bardhë, sepse ju jeni ata që na keni sjell këtu”, u tha ai me mijëra përkrahëse në sheshin qëndror të Prishtinës.
Po si triumfator, duke qenë komod si i tillë, Albin Kurti përcolli falenderime për kundërshtarët, e veçoi më pas Vjosa Osmanin, atë e rivalizoi përgjatë gjithë numërimit të votave, duke dhënë sinjale se do e ketë në kabinetin e tij gruan që aspiroi dhe ajo të ishte kryeministre.
“Edhe ata që kanë sulmuar, veç na kanë kalitur në këtë fitore të madhe. Edhe kundërshtarët e mi në këto zgjedhje i falenderoj për konstruktivitetin. Në veçanti dua ta falenderojë zonjën Vjosa Osmani. Ajo me fushatën e saj ka inspiruar shumë gra që të aktivizohen në shoqëri, në ekonomi. Prandaj unë dua që të bashkëpunojë me Vjosën”, deklaroi kreu i Vetëvendosjes.
Kujtojmë se kjo fitore e VV-së, vjen pas një zhvillimi negativ në këtë forcë afro dy vite më parë, kur partia u “shqye në dysh” prej një valë ikjeje të disa figurave qëndrore, ku veçoi Shpend Ahmeti dhe Visar Imeri, kryetari i saj pas një dorëheqjeje të Albinit nga drejtimi i partisë. Ishte pikërisht ky zhvillim, i cili e detyroi Kurtin që të rikthehej në drejtim e sot të jetë fitues zgjedhjesh, një precedent politik i rrallë. /tesheshi.com/
