Parlamenti shqiptar në seancë të jashtëzakonshme ka ngritur institucionin bazik të reformës në drejtësi, kolegjin e apelimit të vettingut. Me 100 vota deputetët e kanë miratuar në një seancë që u mbodh në mes të fushatës zgjedhore. Në seancë nuk ka pasur debat, por vetëm një replikë ndërmjet Edi Ramës dhe Jozefina Topallit.
Kryeministri ka deklaruar se tashmë me vettingun ka nisur një epokë e re për të gjithë shqiptarët, ku përveç gjyqtarëve të korruptuar ka trokitur dera edhe për “ata të paprekshëm që kanë abuzuar me votat e popullit”.
Topalli ka marrë fjalën dhe ka sulmuar Ramën dhe Bashën se listat e vetingut janë emra të paktit Basha-Rama.
“E vërteta është se aq sa ka pasur dhe ka pritshmëri të lartë, aq është edhe rreziku i dështimit të saj të turpshëm. Po filloj me listat që keni përpara meqë nuk guxoni të flisni. Në këtë listë ka miq të ngushtë të kryeministrit, kamikazë politikë të kryeministrit, pushtues tokash. Kanë dhënë para për të mbyllur procese gjyqësore. Këta do bëjnë vetingun? Ata që s’janë të Ramës, janë të Bashës”, tha Topalli.
Menjëherë e ka marrë fjalën kryeministri Edi Rama. Ai tha se akuzat e Topallit janë qesharake, pasi ai nuk njeh asnjë personalisht. Rama tha se në fak është krenar që PS ka mbështetur emrin e Ina Ramës, megjithëse nuk ka miqësi personale për të. Kryeministri u shpreh se njihte si emër dhe Albana Shtyllën, dhe edhe për të ishte krenar që PS e mbështeti.
“Unë i hodha një sy listës që me thënë të drejtën, as e kam parë ndonjëherë. Nuk e di ku mi gjetë këta miq Jozefina dhe kaq shokë. Ta them sinqerisht që do më mungosh shumë në sesionin e ardhshëm parlamentar. Ti dallohesh si kundërshtare e ashpër qeverisë. Kjo është fatura që duhet të paguani juve. Ça t’ju bëj unë që juve u futët në çadër ku disa ishin në çadër, disa thoshin që jemi jashtë dhe disa bërtisnin që jemi deri sa të dilnin listat për deputetë. Unë nuk e njoh këtë listë.
Unë jam krenar që ne kemi mbështetur Ina Ramën dhe jam i keqardhur që t’i përmend Ina Ramën, e cila është shembulli më i pastër se si e keni përndjekur politikisht. Nuk e kam mikeshë. Njoh Albana Shtyllën, as ajo nuk është mikesha ime, por jam krenar. Më vjen keq që e mbylle me një nivel kaq të ulët karrierën tënde parlamentare. Mund ta kishe gjetur mënyrën më të denjë për të ikur prej këtu. Megjithë se unë jam i bindur që t’i do kthehesh bashkë me Astritin një ditë këtu”, tha Rama. /tesheshi.com/
