Një histeri e pakuptimtë përfshiu një pjesë të shoqërisë shqiptare, në Shqipëri e Kosovë, ndaj një takimi krejt të paralajmëruar – pasi ishte i planifikuar – mes Ramës e Vuçiçit, në kuadër të projektit të Schengenit ballkanik, në prani të Zaevit, gjithashtu Gjukanoviçit, e për herë të parë dhe nga ndërkombëtarë; pasi siç po kuptohet, ky projekt është një investim perëndimor, një rrugë nga një “tjetër drejtim”, për integrim përfundimtar në BE të vendeve të rajonit. Të paktën Meta e ka kuptuar këtë, ndërsa Basha edhe në pastë kapacitetin ta kuptojë, s’ka këllqe të pranojë. Siç në rastin e armëve kimike, që në një lojë të trashë politike, siç ka të gjithë të tilla, shkoi dhe preu në besë amerikanët në Tiranë.
Eshtë e vështirë të hasësh një fije shkak logjik në gjithë këtë histeri që vijon ende, pasi asgjë nuk qe për “herë të parë”, ku zakonisht ndodhin befasirat; Rama e Vuçiç nuk takoheshin për herë të parë, Vuçiç nuk ishte në Tiranë për herë të parë, nuk takonte gjithashtu një politikan shqiptar për herë të parë por herë të “n”-të, e sigurisht që as si takim në kuadër të Schengenit nuk ishte për herë të parë. Nuk ishte për herë të parë gjithashtu as qëndrimi kontravers i tij ndaj së djeshmes së luftës. Pas gjitha këtyre, pse kjo histeri?
Schengeni rajonal, si çdo pakt tjetër në botë e histori mes armiqve, domosdo do ketë dhe debat, domosdo do ketë dhe kundërshtarë. Por ama, së paku çdokush që bën si i marrë prej asaj që po ndodh mes Ramës, Vuçiçit e të tjerëve rreth tyre, duhet të kuptojë se nuk po ndodh asgjë e paparë më parë. E gjithë historia ofron shembuj rastesh të pafundme të diplomacisë që, ashtu sic politika është shah, e që dublon luftën mes atyre që për shumë shkaqe janë në armiqësi.
Për këtë, mjafton ajo që në historinë islame njihet si marrëveshja e Hudejbijes, ku Profeti Muhamed nënshkroi me armiqtë lëshime të atilla që u çuan qimet përpjetë nga marrazi përkrahsve të tij; thënë ndryshe, po i falte disa gurrë kundërshtarit, gjë do rezultonte më vonë me triumf final: me një mat fantastik. Ajo marrëveshje, ndodhur dhjetra shekuj më parë, mund të konsiderohet dhe si shkolla e parë e diplomacisë moderne.
Veç serbëve, ne kemi dhe grekët. Edhe ata na kanë vrarë e prerë, referuar tragjedisë çame. Greqia as që e njeh si çështje e është shumë më tepër armiqësore në këtë pikë me faktorin shqiptar. Megjithatë, mes dy palëve, marrëdhëniet vazhdojnë, sikur asgjë mos kish ndodhur, e siç dihet, Rama është i pari politikan i lartë shqiptar që ia ka thënë hapur Athinës atë çfarë mendonte për çështjen çame.
Nga ana tjetër, sot një çam e një grek janë ortakë në bisneze, bashkëjetojnë me njëri-tjetrin në hapësira urbane, siç në jug, ashtu siç edhe mes serbëve e shqiptarëve (posaçërisht kosovarëve), marrëdhëniet tregtare vijojnë normalisht. Prania në gati 70 përqind e produkteve greke në tregun kosovar, nuk është diktat me armë; ajo është marrëdhënie tregu.
Ndaj edhe njëherë: për çka gjithë ajo histeri?
Dhe dalim tani te Haradinaj, më i zëshmi për të “gjuajtur pushkë” ndaj Ramës. Më 6 tetor, ai morri një goditje politike me votë. Që do të thotë, se u refuzua si projekt politik, me çfarë bëri e la gjatë qeverisjes, përfshirë dhe taksën ndaj Serbisë.
Vota është instrumenti i vetëm i matjes së vlerës politike në demokraci, e mbasi ke pësuar disfatë me të, është mirë të heshtësh. Përpjekja e tij për t’u imponuar lider kur qartazi nuk është, sidomos pas 6 tetorit, e shndërron në komik. Ai ka boll atribute për t’u mbajtur me nder në jetën publike kosovare; ajo çfarë ka dhënë në luftë, ai dhe familja e tij, heroikja e ballafaqimit me akuzat e pasluftës e dalja i pafajshëm prej tyre, po ashtu dhe cilësitë fizike në të bërit vrap në mal, bërjes së pompave, si dhe të mbajturit e një trupi me tipare rinore. Nuk janë pak. Por në politikë, epoka e tij, ndonëse kurrë s’ka qenë epokal në të, pothuajse ka mbarruar. Nëse vërtet do ishte lider, do kish zgjedhur një formë inteligjente në trajtimin e taksës. T’a hiqte atë pas imponimit ndërkombëtar, e, si lider, t’u bënte thirrje kosovarëve të mos blinin asnjë produkt të ardhur nga Serbia. Si do ishte rezultati, çfarë do ndodhte? Përgjigjen e gjeni më 6 tetor…/tesheshi.com/
