Debati i dytë presidencial i demokratëve në Amerikë u zhvillua vetëm pak orë pas sulmeve gjakderdhëse në Paris.
Të tre kandidatët, Hillary Clinton, Bernie Sanders dhe Martin O’Malley, e filluan debatin me momente heshtjeje në nderim të viktimave të Parisit.
Duke iu referuar masakrës së para pak orëve, që nuk mund të mos bëhej pjesë e këtij debati, ish-sekretarja amerikane e Shtetit, Hillary Clinton, bëri thirrje për unitet global për ta shkatërruar ISIS-in.
E pyetur gjatë këtij debati nëse ajo beson se SHBA-të janë në luftë me “Islamin radikal”, Clinton do të shprehej qartë: “Unë nuk mendoj se jemi në luftë me Islamin. Unë nuk mendoj se jemi në luftë me të gjithë muslimanët. Unë mendoj se jemi në luftë me xhihadistët.”
Ish-sekretarja amerikane e Shtetit do të përmendte George W. Bush-in kur kërkoi që të mos demonizohej besimi islam. Ajo i quajti si një kontribut të vërtetë të ish-presidentit Bush fjalët e tij pas 11 shtatorit, kur ai do të deklaronte pas vajtjes në një xhami në Uashington: “Ne nuk jemi në luftë me Islamin apo me muslimanët. Ne jemi në luftë me ekstremizmin e dhunshëm. Ne jemi në luftë me ata që e përdorin fenë e tyre për qëllime pushteti dhe shtypjeje.”
“Po, ne jemi në luftë me këta njerëz,” i vuri pikën çështjes Hillary Clinton. /tesheshi.com/
