Demokratët dhe ish-sekretarja amerikane e Shtetit kanë shkruar historinë në konventën e tyre. Hillary Clinton është e para femër që kandidon për postin e kreut të shtetit amerikan.
Zyrtarimi i saj ishte thjesht një çështje proceduriale, pasi dihej më herët që ajo e kishte mbështetjen e duhur për t’u shpallur kandidate e demokratëve.
Dita hapëse e konventës së demokratëve nuk qe aq kurajuese për Clinton-in, ngaqë shpeshherë shqiptimi i emrit të saj u shoqërua me zëra kundërshtues, ashtu siç u dëgjuan dhe thirrje në përkrahje të kundërshtarit të saj në fushatën partiake, Bernie Sanders-it.
Numërimi i votave të nevojshme për garantimin e kandidaturës solli dhe fashitjen e zërave kundër, ndërsa Hillary Clinton i përshëndeti delegatët nga Nju Jorku.
“Jam shumë e lumtur. Eshtë një ditë dhe një natë e madhe,” tha tashmë kandidatja e demokratëve në garën presidenciale në SHBA.
“Çfarë nderi të pabesueshëm më keni bërë. Faleminderit ju dhe çdokujt që ka luftuar aq fort për ta bërë këtë të mundur,” ka shtuar Clinton.
Një fjalë i kushtoi kandidimit të saj dhe i shoqi, ish-presidenti amerikan Bill Clinton, që do ta përshkruante kështu atë: “Kjo grua nuk është kënaqur kurrë me statukuonë në gjithçka.”
Hillary Clinton do të ketë përballë në garën presidenciale një figurë të tillë si Donald Trump. Përfaqësuesi i republikanëve është i njohur për aftësinë e tij për të ngjallur në çdo rast polemika pa fund. /tesheshi.com/
