Ish-sekretarja amerikane e Shtetit ka deklaruar fitoren në votimet paraprake në Porto Riko, duke e bërë gjithnjë e më të sigurt kandidimin për në zgjedhjet presidenciale në SHBA.
“Sapo fituam Porto Rikon,” ka shkruar Clinton në faqen e saj në Twitter.
Sipas agjencisë së lajmeve Associated Press, Hillary Clinton-it i mungojnë tani më pak se 30 delegatë për të arritur numrin 2.383, që i mundëson kandidimin e drejtpërdrejtë si kandidate e demokratëve.
Rezultatet e votimeve paraprake në Porto Riko kanë vonuar të dalin, pasi votat janë numëruar me dorë. Ndërkohë që mund të marrin pjesë në votimet paraprake dhe janë qytetarë amerikanë, shpjegon The Guardian, portorikanët nuk mund të votojnë për presidentin në nëntor. Ata duhet të zhvendosen në territorin e madh amerikan dhe të ndryshojnë vendbanimin që të kenë mundësi të votojnë në zgjedhjet e përgjithshme.
Ndërsa të martën votohet në Kaliforni, në Nju Xhersi, Nju Meksiko, në Dakotën e Jugut dhe në Montana, Hillary Clinton është shumë pranë kandidimit historik. Ajo do të bëhet e para kandidate femër e një partie të madhe politike amerikane në zgjedhjet presidenciale në SHBA. /tesheshi.com/
