Audio-përgjimi i bërë publik nga Partia Demokratike, ku dyshohet se personi që flet për pazare droge është vëllai i ministrit të Brendshëm Agron Xhafaj është dërguar për ekspertim jashtë vendit. Lajmin e bëri të ditur prokuroria e Krimeve të Rënda që përmes një deklarate thotë se hetimet po kryhen nga një grup hetimor i përbërë nga dy prokurorë dhe dy oficerë të policisë gjyqësore të Prokurorisë së Krimeve të Rënda të Tiranës.
Sipas prokurorisë, janë duke u kryer veprime hetimore të gjithanshme brenda dhe jashtë vendit. Ndërkaq, “ka filluar dhe kryerja e verifikimeve pasurore për shtetasin Geron Xhafaj, i ditëlindjes 08.06.1975, me kombësi dhe shtetësi shqiptare, lindur dhe banues në Vlorë”.
Prokuroria bën të ditur se është bërë edhe bashkimi i dosjeve, asaj për kallëzim të rremë të bërë nga Agron Xhafaj, dhe ajo për trafikim të lëndëve narkotike. /tesheshi.com/
