Pas homazhe para lapidarëve të serbëve të vrarë gjatë luftës bërë vitin e kaluar, për çka u kritikua shumë kryesisht nga ish-ushtarët e UÇK-së, presidenti Hashim Thaçi, ka marrë iniciativë për themelimin e komisionit “Për të vërtetën dhe pajtimin”, për çka është mbajtur sot takimi i parë.
Ai, në hapjen e këtij takimi tha se ky është hapi i parë që nga pas lufta për të bërë diçka për krimet e luftës, pasi sipas tij tmerret e saj janë ende prezente.
Sipas tij, është e rëndësishme të pranohen dhe të shprehen krimet në mënyrë që të mund të shikohet kah e ardhmja.
“Nuk jemi mbledh të flasim se cila familje e cilës etni ka vuajtur më shumë dhe më pak. Kam pasur takime me të githë familjet e të pagjeturve me të gjitha komunitete dhe po mundohem t’i kuptoj dhimbjet e tyre. Ata kanë njohur njëri-tjetrin në dhimbje dhe janë familjarizuar në kauzën e tij. Pajtimi më i shpejtë dhe i parë ka ndodhur në mes familjeve të të pagjeturve. Shembulli më i mirë për ne të tjerët se si të kthejmë sytë nga e ardhmja dhe të mos jemi peng i së kaluarës”, tha Thaçi.
Kryeministri Isa Mustafa përshëndeti iniciativën e presidentit Thaçi, duke uruar që ky projekt të jetë i suksesshëm.
“Duke u ballafaquar guximshëm me të kaluarën fitojmë shpresën për të gjithë qytetarët tanë. Asnjë e keqe dhe vrasje nga e kaluar nuk mund të në ndalojë për të ardhmen tonë nëse ajo ndëshkohet dhe zbatohet mjaftueshëm”, tha Mustafa.
Ndërsa kryekuvendari Kadri Veseli, mirëpriti mbajtjen e këtij takimi duke thënë se kjo iniciativë tregon vullnetin institucional dhe njerëzorë që të ndriçohet e kaluara, dhe të ballafaqohet me plagët e së kaluarës
“Derisa vitit po kalojnë ne kemi ende me mijëra qytetarë të cilët janë të pagjetur, qindra familje kosovare ende jetojnë nën peshën e dhembjes së rëndë duke mos ditur për fatin e familjeve të tyre. Ata vijnë nga shumë komunitetet dhe shumica dërmuese janë shqiptarë”, ka thënë Veseli. /tesheshi.com/
