Anglia ka shmangur një barazim ndaj Tunizisë që do ta vinte para kritikave të forta, dhe kjo falë dy golave të kapitenit Harry Kane.
Por pavarësisht fitores, përfaqësuesja angleze qe zhgënjyese në një pjesë të mirë të lojës, veçanërisht për paqartësinë e theksuar në organizimin e sulmeve, si dhe për një apati të ca prej lojtarëve të saj.
Anglezët e nisën mirë ndaj tunizianëve, për ta gjetur shpejt golin e avantazhit, në minutën e 11-të. Një seri rastesh më tej nuk u shfrytëzuan, ku spikat Sterling me shpërdorimet e zakonshme për të.
Një ndërhyrje e panevojshme në zonë sjell një 11-metërsh për tunizianët, kthyer në gol në minutën e 35-të nga Sassi.
Pjesa e dytë qe një mbizotërim në fushë i anglezëve, por pa shumë goditje në portën kundërshtare. Dhe pikërisht kur po shkohej drejt barazimit, Kane godet sërisht në minutat shtesë, për të vulosur fitoren 2-1.
Rezultati e bashkangjit Anglinë me Belgjikën në kryesimin e grupit G, me nga 3 pikë. Panamasë dhe Tunizisë u duhet të presin ndeshjet e dyta për të shpresuar të marrin pikën e parë në Botërorin e Rusisë. /tesheshi.com/
