Kryeministri Haradinaj për dallim nga vikendet e kaluara që kryesisht i ka kaluar nëpër bjeshkë, këtë javë ka qëndruar në Prekaz ku ka vizituar kullën e heronjve Meha së bashku me pasardhësin e familjes Jashar, Bekimin që njëherit është kryetar i Skenderajt.
Me këtë rast kryeministri tha se Prekazi bashkon shumë histori për shqiptarët.
“Rezistenca dhe lufta heroike e Tahir dhe Nebih Mehës tregoi se shqiptarët nuk do të frikësohen më para regjimit të atëhershëm që burgoste dhe maltretonte rininë e Kosovës. Edhe më herët ishte Ahmet Delia, tani është Tahiri e Nebihi, por ai që vërtet na nderon gjithë neve si komb është komandanti legjendar Adem Jashari, familja Jashari”, Haradinaj, pas homazheve te varri i Tahir dhe Nebih Mehës, në 37-vjetorin e rënies së tyre.
Kurse Bekim Jashari tha se është obligim i të gjithë neve t’i nderojmë dhe respektojmë heronjtë dhe dëshmorët tanë.
Ai tha se rënia e tyre 37 vjet më parë i ka motivuar të rinjtë dhe të rejat se si duhet atdheu.
Kurse Ilir Meha, nipi i Tahir Mehës, falënderoj kryeministrin Haradinaj për ardhjen në Prekaz, për të nderuar gjakun e derdhur për liri të heronjve të parë të luftës së Shaban Polluzhës. /tesheshi.com/
