Pavarësisht reagimeve të forta të Moskës, kryeministri Haradinaj kërkon shpalljen “non grata” të rusit të UNIMIK-ut, arrestuar gjatë operacionit policor të dy ditëve më parë në Veri, por që liruar më pas.
“Sot, kam kërkuar nga Ministria e Punëve të Jashtme që në bazë të kompetencave kushtetuese dhe ligjore të shpallim shtetasin rus z.Mikhail Krasnoshchenkov si person ‘Non Grata’. Vendimi është marrë sot ndaj këtij personi që punon si staf ndërkombëtar në Kombet e Bashkuara, dhe të njëjtit i urdhërohet që ta lëshojë territorin e Republikës së Kosovës. Ky vendim ka hyrë në fuqi, sot nga 31 maj 2019”, ka bërë me dije shefi i qeverisë së Prishtinës.
Moska reagoi duke thënë se Krasnoshchenko ishte me imunitet diplomatik, e për rrjedhojë, arrestimi i tij përbënte një shkelje të normave ndërkombëtare. Por Prishtina konsideron se ai po shkelte ligjet e vendit, e më rëndë akoma, rendin kushtetues.
Për Mikhail Krasnoshchenkon, u tha se qëndronte pas reagimit me barrigada të serbëve të Veriut, përgjatë orëve të operacionit. /tesheshi.com/
