Ushtruesi i detyrës së kryeministrit të Kosovës, Ramush Haradinaj kërkoi këtë të martë që votimi për anëtarësimin e Kosovës në Interpol të shtyhej për vitin e ardhshëm.
Sipas qeverisë së Kosovës, Haradinaj, në përputhje me kompetencat e kryeministrit, në funksion të rrethanave dhe me rekomandimin e Ministrisë së Punëve të Jashtme, kërkoi shtyrjen e votimit për anëtarësimin e Kosovës në Interpol për vitin e ardhshëm.
Asambleja e Përgjithshme e Interpolit, e cila filloi në Kili të martën dhe do të zgjasë deri më 18 tetor, ishte për të votuar në favor të anëtarësimit të Kosovës në Organizatën Ndërkombëtare të Policisë.
Kosova është refuzuar tre herë që nga viti 2015, dhe zyrtarët e Kosovës ia kanë atribuar dështimin fushatës së ashpër të Serbisë kundër kandidaturës së Kosovës.
Pas dështimit të anëtarësimit në Interpol vitin e kaluar, qeveria e Kosovës vendosi në formë hakmarrëse, pa e fsheshur aspak këtë motiv, një takse prej 100 përqind për importet e mallrave nga Serbia.
Ministri i brendshëm serb Nebojsa Stefanoviç tha në Kili të martën se tërheqja e kërkesës së Kosovës për anëtarësim në Interpol paraqet një fitore të madhe për Serbinë dhe ligjin ndërkombëtar.
“Për shkak të shumicës së shteteve anëtare të Asamblesë së Përgjithshme të Interpolit që vendosin të mos mbështesin aplikimin e institucioneve të Prishtinës, kërkesa e Prishtinës për të qenë pjesë e Interpolit u tërhoq menjëherë para seancës së Asamblesë së Përgjithshme”, tha Stefanoviç, i cili kryeson delegacionin serb në Asamblenë e 88-të të Interpolit në Santiago.
Stefanoviç theksoi se kjo ishte një fitore e rëndësishme diplomatike për Serbinë, por edhe për fitoren e ligjit ndërkombëtar, policinë dhe të gjitha ato vende që folën në favor të moslejimit të politizimit të Interpolit. /tesheshi.com/
