Nga Blendi Gashi
Nuk ka zgjatur gjatë miqësia mes Ramush Haradinajt dhe Albin Kurtit, e shfaqur ngrohtë më 5 prill në një konferencë, ku kryevetëvendosësi ja dha ushqimin e tij kryeministrit.
Ata tashmë janë kthyer në “armiq” ku nuk lënë paraqitje publike pa hedhur akuza ndaj njëri-tjetrit.
Pak ditë pasi u përplasën nga distanca rreth shkuarjes apo jo në zgjedhje të reja, ata janë kapur keq në seancën plenare të së enjtes, duke garuar për fuqinë politike të partive të tyre, çështjen e Demarkacionit si dhe për çështje ekonomike.
E gjitha nisi pas Kurti i tha Haradinajt se premtimet e tij nuk do të realizohen asnjëherë pasi është në pozitë të dobët, duke thënë se pas vetës ka veç 52 deputetë.
“Një kryeministër në pozitë kaq të dobët s’mundet me bashku Mitrovicën e as me i mbajt premtimet për atë pjesë të territorit”, tha Kurti.
Haradinaj reagoi menjëherë me ç’rast pranoi se qeveria që udhëheq s’është perfekte, ndërsa ja përmendi Kurtit ndarjen e VV-së.
“Unë kam kandidu me një koalicion. E kam përmbi marrën, e kam jep dorën. Na s’jena perfekt. Edhe ju një parti jeni kanë e jeni nda. Për parti, unë i kam veç 10 deputetë, të hujt e të konopit, ama asnjëherë s’kanë livrit. Jam shku në burg e kam nejt tetë vjet, e kur jam kthyer qitu i kam gjete. Maj edhe ti tut në muajsh”, tha Haradinaj.
Kryevetëvendosësi u kundërpërgjigj duke i thënë se VV edhe me u nda prapë mbetet më e madhe se AAK-ja.
“Deputetët e VV-së nuk janë familjarë e kushëri të mijë. Nuk është që janë të huajt e të konopit, por janë të shtëpisë. Edhe me u nda, prapë mbesim më shumë se AAK-ja”, tha Kurti.
Ai më tej akuzoi Haradinajn se ka marrë stafetën nga Thaçi për dialogun, ndërsa ja përmendi edhe Demarkacionin me Malin e Zi.
“Ky u kanë i detyruar me sjell Demarkacionin e me miratu, për me qenë kryeministër. Haradinaj s’është kryeministër. Është veç në detyrë. Është shndërruar në korrier të presidentit”, tha Kurti.
Nuk mungoi reagimi i Haradinajt.
“Ty s’ta ka ni për Demarkacion hiç, e keni pas veç kartë. As kolegëve tu që i ki afër nuk ua ka ndi. Nuk ju dhimti hiç minimizimi i raportit të Bulliqit. Mbesim me përgjegjësitë që ne i kemi marrë. Jemi me Veselin. Edhe ty ta pata dhanë dorën, po s’mujtëm me çu ma larg”, u kundërpërgjigj Haradinaj.
Por Kurti tha se partia e tij nuk është ajo që e ka ndërruar rrugën për Demarakacionin.
“Ne kemi qenë bashkë në kundërshtimin e Demarkacionit. Na s’e kemi ndërruar rrugën. E keni keqpërdor opozitarizmin për me u shit më shtrenjtë tek ata (Thaçi e Veseli). Nuk e kisha besuar që sërish e sillni në Kuvend raportin e Murat Mehës, pas raportit të Shpejtim Bulliqit. Ne nuk do ta bënim një gjë të tillë”, tha Kurti.
Ky reagim siç duket i dhimbti jo pak Haradinajt i cili më pas ja përmendi Kurtit largimin e Shpend Ahmetit nga partia.
“Sikur të kish qenë Shpend Ahmeti, kryetar i partisë simotër tash në Vetëvendosje, ndoshta tash kishi thënë se një punë e ke bë sa ke qenë kryeministër, e ai është Ligji për Prishtinën. Por, meqë nuk e ki në parti, tash as atë punë nuk po ma njeh. Po nasht”, tha Haradinaj.
Por Kurti ju kundërpërgjigj kryeministrit, duke i thënë se po kërkon të devijon temat.
“Ishte me neve, shkove të Thaçi e Veseli, e tash mendon që t’u i devijuar temat, harrohen ato që u thanë më herët. Ty të kanë marrë me qira për me krye Demarkacionin e Asociacionin”, tha Kurti.
Por Haradinaj ia përmendi sërish Kurtit Ligjin për Prishtinën si dhe Statutin e Trepçës, çka më pas Kurti e testoi jo pak kryeministrin në ekonomi.
“Sa metoda janë për ta llogaritur bruto produktin vendor dhe na thoni njërën nga to”, e pyeti Kurti.
Por Haradinaj nuk u përgjigj në këtë pyetje, dhe i tha Kurtit.
“Më doket në të njëjtën klasë në ekonomi jena unë e ti, se jena t’u i mësuar në të njëjtën kohë me investime kapitale. Faleminderit për metoda. E kemi Lumir Abdixhikun (deputet i LDK-së, Dardan Sejdiun (deputet i PSD) e të tjerët që na ndihmojnë. Duhemi me qenë më korrekt”, tha Haradinaj.
Fjalën e mori sërish Kurti ku ironizoi me Haradinajn duke i thënë ta tregon metodën më të lehtë me llogarit bruto produktin vendor.
“S’mundesh me qenë kryeministër, e mos me dit qysh llogaritet bruto produkti vendor”, tha Kurti.
Haradinaj më nuk e mori fjalën dhe doli nga seanca. /tesheshi.com/
